Las autoritads svizras online

directamain tar il cuntegn

Cumprar ina chasa u in'abitaziun en Svizra sco persuna estra

Vus essas ina persuna estra e vulais cumprar in'abitaziun u ina immobiglia en Svizra? Eventualmain duvrais Vus ina permissiun.

Vus vivais en Svizra

Persunas d'in pajais da la UE/AECL

Sco burgais da la UE/AECL cun domicil en Svizra avais Vus ils medems dretgs sco persunas svizras, sche Vus vulais cumprar immobiglias.

Persunas d'in terz stadi

Abitaziuns principalas (p.ex. chasas d'ina famiglia ed abitaziuns da proprietad) e terren da construcziun en Voss lieu da domicil pudais Vus cumprar senza permissiun, sche Vus ademplis las suandantas premissas:

  • Vus stuais avair ina permissiun da dimora valaivla, per regla ina legitimaziun da persunas estras B.
  • Uschè ditg che Vus avais Voss domicil en quest lieu, stuais Vus abitar sez en l'abitaziun.
  • Sche Vus vulais construir sin in terren cumprà, stuais Vus cumenzar entaifer 1 onn cun las lavurs da construcziun.

Per las suandantas abitaziuns duvrais Vus ina permissiun:

  • abitaziuns da vacanzas
  • unitads d'abitar en uschenumnads hotels d'appartaments (hotels cun abitaziuns)
  • abitaziuns secundaras

Persunas estras che han proprietad funsila en Svizra n'han betg automaticamain il dretg d'ina permissiun da dimora.

Vus abitais a l'exteriur

Sche Vus abitais a l'exteriur, pudais Vus cumprar immobiglias sut tschertas restricziuns. As infurmai per plaschair tar l'autoritad chantunala (uffizi dal register funsil u inspecturat dal register funsil).

Immobiglias che Vus vulessas utilisar per intents economics pudais Vus cumprar er senza permissiun.

Co proceder?

Sche Vus vulais cumprar ina chasa, in'abitaziun u ina immobiglia, stuais Vus sclerir tar l'autoritad cumpetenta (uffizi dal register funsil u inspecturat dal register funsil), sche Vus ademplis tut las premissas necessarias u sche Vus duvrais ina permissiun.

Uffizi dal register funsil / inspecturat dal register funsil