En Svizra datti trais differents urdens dals bains: la participaziun als acquists, la cuminanza dals bains e la separaziun dals bains.
Participaziun als acquists
En cas ch’ils conjugals na fan nagin contract matrimonial, vala l’urden dals bains ordinari da l’uschenumnada participaziun als acquists.
Concretamain vul quai dir:
Tuts dus conjugals restan proprietaria e proprietari dals bains, ch’els possedevan avant la maridaglia e ch’els survegnan u ertan durant il matrimoni (ils uschenumnads bains propris).
Ils conjugals administreschan ils respargns («participaziun als acquists», p.ex. pajas, tschains) ch’els gudognan durant il matrimoni independentamain in da l’auter.
in caso di separazione/divorzio, morte o di passaggio a un altro regime matrimoniale, gli «acquisti» sono suddivisi in parti uguali tra i coniugi (cosiddetta "liquidazione del regime matrimoniale")
Resguardai il suandant: en general èn tuts dus conjugals responsabels per ils agens debits mintgamai cun l’atgna facultad. Cuminaivlamain ston els be purtar ils debits ch’els han fatg durant il matrimoni per custs en connex cun il basegn quotidian u en enclegientscha vicendaivla.
Cuminanza dals bains
Sche Vus As decidais per la cuminanza dals bains, stuais Vus suttascriver in contract matrimonial en furma d’in act uffizial che vegn per regla redigì d’ina notara u d’in notar.
En quest cas vegn la facultad administrada cuminaivlamain ed en cas d’in divorzi u d’ina separaziun repartida mintgamai per la mesadad sin omadus conjugals.
Da resguardar è ch’il pèr stat bun cun la facultad cuminaivla e cun ils bains propris per debits, ch’els fan per custs en connex cun il basegn quotidian u en enclegientscha vicendaivla.
Separaziun dals bains
Sche Vus As decidais per la separaziun dals bains, stuais Vus suttascriver in contract matrimonial en furma d’in act uffizial che vegn per regla redigì d’ina notara u d’in notar.
En quest cas na vegn la facultad betg unida ed en cas d’in divorzi u d’ina separaziun na datti nagut da reparter.
Resguardai dentant, ch’ils dus conjugals stattan egualmain buns per ils debits, ch’els fan per custs en connex cun il basegn quotidian u en enclegientscha vicendaivla.
Independentamain da l’urden dals bains tschernì vegnan tut ils pèrs maridads e tut ils pèrs registrads suttamess cuminaivlamain a la taglia. Els ston emplenir ora la decleraziun da taglia ensemen.
Per dumondas specificas davart l’urden dals bains e davart il contract matrimonial As drizzai ad in’advocata u ad in advocat ubain ad ina notara u ad in notar da Vossa tscherna.
Per dumondas davart la decleraziun da taglia suenter la maridaglia As drizzai a l’administraziun da taglia da Voss chantun da domicil.
Per dumondas davart las assicuranzas socialas As drizzai a la cassa da cumpensaziun da la AVS, a Vossa cassa da pensiun ed a l’instituziun nua che Vus pajais Vossa 3. pitga.
Ulteriuras infurmaziuns davart il divorzi e davart l’ierta chattais Vus sin las paginas correspundentas da quest portal.
Il manual Prevenziun professiunala en cas d’in divorzi cuntegna infurmaziuns supplementaras per pèrs maridads e per pèrs registrads.
Sin la pagina maridaglia chattais Vus infurmaziuns davart la maridaglia e davart la tscherna dal num.
Sin la pagina partenadi registrà chattais Vus infurmaziuns specificas areguard questa moda d'ina colliaziun.