Las autoritads svizras online

directamain tar il cuntegn

Congedi da maternitad

Tut las mammas cun activitad da gudogn (emploiadas, dunnas cun activitad da gudogn independenta, dunnas dischoccupadas e dunnas che lavuran en l'interpresa da lur um u d'in parent e che retiran ina paja) han il dretg d'in congedi da maternitad pajà.

Il congedi da maternitad dura 98 dis (u 14 emnas). Dunna occupadas a temp cumplain sco er occupadas a temp parzial han il dretg sin quest congedi. Sch'ina dunna cumenza puspè a lavurar pli baud, scada il dretg dal congedi.

Las mammas survegnan 80 % da lur paja en furma da diarias, maximalmain dentant 196 francs per di. Disposiziuns chantunalas, reglaments da persunal e contracts collectivs da lavur pon prevair soluziuns pli autas.

Durant las emprimas 8 emnas suenter la pagliola na dastgan las dunnas emploiadas betg vegnir occupadas.

Premissas

Per che la dunna emploiada survegnia la diaria, sto ella esser assicurada tar la AVS durant ils 9 mais avant la naschientscha ed avair lavurà durant almain 5 mais durant la gravidanza. Ultra da quai sto ella – il mument da la naschientscha – anc adina esser en ina relaziun da lavur, avair in'activitad da gudogn independenta u lavurar en l'interpresa da l'um cunter ina paja en daner blut.

Sche questas premissas n'èn betg ademplidas, na survegn ella betg ina diaria. Ella na dastga dentant er betg vegnir occupada.

Cumenzament

Il congedi da maternitad cumenza cun la naschientscha da l'uffant.

Desditga da la relaziun da lavur

Durant il congedi da maternitad na dastga il patrun betg desdir la plazza da la dunna emploiada.

Broschura davart la protecziun da la maternitad a la plazza da lavur