Las autoritads svizras online

directamain tar il cuntegn

Conflicts da lavur: Posts da contact

Relaziuns da lavur pon svegliar differents conflicts, p.ex. areguard la paja ed il temp da lavur, pervi da discriminaziuns u perquai ch'ina desditga vegn contestada. Ils motivs èn multifars. Co ch'il conflict vegn schlià, dependa d'ina vart dal gener da la relaziun da lavur (dretg public u dretg privat), da l'autra vart dal dumber da persunas pertutgadas (dispitas da lavur collectivas u individualas).

Conflicts da lavur individuals

Savens installeschan ils chantuns dretgiras spezialas per reglar conflicts da lavur e prevesan l'emprim in'emprova da mediaziun obligatorica. Per dispitas cun ina valur en dispita fin 30'000 francs han ils chantuns endrizzà proceduras simplifitgadas e scursanidas. En quests cas vegnan adossads a las partidas mo ils custs per l'advocat, betg dentant ils custs da dretgira. Sche la valur en dispita surpassa 30'000 francs, ston percunter vegnir pajads ils custs da dretgira.
Ils emploiads dal stadi ston sa drizzar en cas d'in conflict als posts administrativs cumpetents prescrits.

Conflicts da lavur collectivs

Sche plirs lavurants èn pertutgads dal medem conflict da lavur, discurran ins da conflicts da lavur collectivs. Per questas dispitas èn cumpetents posts da mediaziun chantunals permanents. Sch'il conflict pertutga plirs chantuns, vegn consultà l'Uffizi federal da conciliaziun concernent conflicts collectivs da lavur.

Posts d'infurmaziun giuridica e dumondas frequentas davart dispitas da dretg da lavur (en tudestg)

Post da mediaziun chantunal per dispitas da dretg da lavur (en tudestg)

Uffizi federal da conciliaziun concernent conflicts collectivs da lavur interchantunals (en tudestg)

Discriminaziun a la plazza da lavur: Tractament inegual, mulestas sexualas

Tgi ch'è la victima d'ina discriminaziun a la plazza da lavur, po pretender:

  • ch'ina discriminaziun imminenta vegnia scumandada
  • ch'ina discriminaziun existenta vegnia eliminada
  • che la discriminaziun vegnia constatada
  • ch'i vegnia concedida ina indemnisaziun

La pretensiun d'eliminar la discriminaziun sto vegnir drizzada al patrun e po vegnir fatga valair davant dretgira.

En cas da discriminaziuns pervi da la schlattaina pon ils lavurants contactar il post da mediaziun previs da la Lescha d'egualitad. En intgins chantuns èsi schizunt obligatoric da contactar l'emprim il post da mediaziun, avant ch'inoltrar in plant giudizial. Plinavant valan tschertas facilitaziuns da procedura. Ultra da quai po la victima – sut circumstanzas – er far pass penals cunter il delinquent (p.ex. pervi da constricziun, perquai ch'il delinquent ha mess maun vi da la victima u mulestà sexualmain la victima e.u.v.).

Posts da mediaziun en cas da discriminaziun tranter um e dunna (en tudestg)

Protecziun giuridica en cas da discriminaziun rassistica (en tudestg)

Cussegliaziun giuridica per persunas cun impediments

Mobing a la plazza da lavur

Sche Vus suspectais che Voss collegas da lavur (persuna singula, gruppa) u Vossa persuna superiura fetschia mobing cunter Vus, duessas Vus cumenzar a rimnar mussaments davart exclusiuns e davart schicanas. Quests acts pon esser fitg variads: sbragidas envers la victima, insultaziuns, critica permanenta, terror da telefon, smanatschas, tractar la victima sco aria, surdar incumbensas absurdas e.u.v. Pir cur ch'ins ha mussaments, pon ins far pass giuridics cunter ils delinquents.

Discurri sche pussaivel cun Voss patrun davart Voss suspect. Sche questa discussiun vegn refusada u sch'il resultat n'è betg cuntentaivel, stuais Vus infurmar en scrit il patrun davart la situaziun ed al supplitgar d'As gidar. Il patrun è obligà tras lescha da far quai.

Sch'il patrun na fa nagins pass concrets per terminar la situaziun da mobing, pudais Vus consultar l'inspecturat chantunal da lavur.

Mulestas sexualas e mobing a la plazza da lavur (en tudestg)

Inspecturat chantunal da lavur