Las autoritads svizras online

directamain tar il cuntegn

Concubinat

D'in concubinat discurran ins, sche duas persunas vivan ensemen senza attest da matrimoni. Tgi che viva en in concubinat, na giauda betg la medema protecziun sociala e giuridica sco in pèr maridà. Cun in contract da concubinat pudais Vus dentant As segirar.

Situaziun giuridica senza contract da concubinat

Perquai ch'il concubinat n'è betg reglà tras leschas, na vegnan ils partenaris da concubinat betg tractads giuridicamain sco conjugals, mabain per gronda part sco persunas singulas.

Num

Perquai ch'il concubinat n'è betg reglà tras leschas, na vegnan ils partenaris da concubinat betg tractads giuridicamain sco conjugals, mabain per gronda part sco persunas singulas.

Naziunalitad

Er per l'acquist d'ina naziunalitad n'ha il concubinat nagina influenza.

Prevenziun per la vegliadetgna (AVS) e cassa da pensiun

La AVS vegn reglada individualmain per mintga partenari da concubinat. Tgi che na va betg a lavurar, po pajar l'uschenumnà import minimal da la AVS. Ulteriuras infurmaziuns davart las largias tar las contribuziuns da la AVS chattais
Sch'ils partenaris sa separan in da l'auter, n'han els in vers l'auter nagin dretg ch'ils dabuns tar la cassa da pensiun e da la AVS vegnian cumpensads.

Cumprar ina chasa

I dat differentas furmas da proprietad: proprietad exclusiva, proprietad en condomini e proprietad cuminaivla. La proprietad vegn repartida sin ils dus partenaris tenor la participaziun finanziala ed inscritta en il register funsil. Avant la cumpra fai senn da reglar en scrit, tgi che sto bandunar il dachasa cuminaivel en cas d'ina separaziun.

Taglias

Tgi che viva en in concubinat, vegn suttamess a la taglia sco persuna singula. Tuts dus partenaris survegnan atgnas decleraziuns da taglia.

Uffants

Sch'ils geniturs n'èn betg maridads in cun l'auter e sch'els vulan exequir cuminaivlamain la tgira genituriala, ston els dar giu cuminaivlamain ina decleraziun respectiva en scrit. Per che la tgira genituriala cuminaivla possia vegnir installada, ston ils geniturs declerar ch'els:

  • sajan pronts da surpigliar cuminaivlamain la responsabladad per l'uffant
  • hajan chattà ina cunvegna davart la surveglianza da l'uffant e davart las relaziuns persunalas u davart la participaziun da mintga genitur a la tgira da l'uffant sco er davart la contribuziun da mantegniment per l'uffant.

Questa decleraziun po vegnir consegnada cuminaivlamain ubain en l'uffizi da stadi civil ensemen cun la renconuschientscha d'uffants ubain separadamain a l'autoritad per la protecziun d'uffants.

Adoptar l'uffant dal partenari / da la partenaria

Mort dal partenari

  • Ierta: Sch'in partenari da concubinat mora, n'erta l'auter betg automaticamain. Er tras in testament po l'auter partenari vegnir favurisà mo limitadamain, sch'i ston vegnir observadas uschenumnadas parts obligatoricas (imports minimals tenor il dretg d'ierta) da descendents u da geniturs.
  • Taglias sin l'ierta: Sch'in partenari en concubinat erta tuttina, perquai ch'il partenari mort ha ordinà quai en ses testament, sto il partenari survivent savair ch'el n'ha nagin dretg da la tariffa da taglia sin l'ierta pli favuraivla che vala en la gronda part dals chantuns per ils proxims parents.
  • Renta per vaivs: Partenaris en concubinat na survegnan betg ina renta per vaivs da la AVS u da l'assicuranza cunter accidents.
  • Tar bleras cassas da pensiun ha il partenari survivent mo in dretg limità da prestaziuns per survivents.

Contract da concubinat

Il partenadi registrà è mo pussaivel per pèrs da la medema schlattaina. Pèrs eterosexuals che na vulan betg maridar resp. pèrs omosexuals che na vulan betg laschar inscriver lur partenadi, che vulessan dentant avair tschertas segirezzas giuridicas, pon far in contract da concubinat.

Furma dal contract

Il contract da concubinat n'è betg reglà tras leschas. Igl è raschunaivel da far ina cunvegna en scrit. Quella na sto betg vegnir documentada uffizialmain d'in notar, nun ch'ella cuntegnia er disposiziuns dal dretg d'ierta.

Cuntegn dal contract

I fa senn da reglar ils suandants puncts:

  • Tge tutga a tgi? (inventari)
  • Sch'ins cumpra ina chasa: Cumprain nus l'edifizi? En proprietad cuminaivla?
  • Tgi resta en l'abitaziun cuminaivla suenter ina separaziun e tge termins da desditga ston ins observar?
  • Co repartain nus ils custs dal tegnairchasa?
  • Quant autas èn las contribuziuns da mantegniment ch'il partenari finanzialmain pli ferm paja mintga mais al partenari finanzialmain pli debel suenter ina separaziun?
  • Co partain nus nossa facultad e co indemnisain nus perditas tar la cassa da la AVS e tar la cassa da pensiun?
  • Cas da mort: Faschain nus in'assicuranza da ristga da mort, nua ch'il partenari survivent vegn favurisà?
  • Uffants: reglar il dretg da tgira e las contribuziuns da mantegniment
  • e.u.v.