Las autoritads svizras online

directamain tar il cuntegn

Co vegn chastiada la criminalitad da giuvenils?

Per giuvenils tranter 10 e 18 onns vala in dretg penal spezial – il dretg penal per giuvenils. Il dretg penal per giuvenils sa cumpona da la Lescha federala davart il dretg penal per giuvenils (Dretg penal per giuvenils, DPG) e da la Lescha federala davart la procedura penala per giuvenils (Procedura penala per giuvenils, PPG).

A partir da 10 onns èn uffants penalmain maiorens

La maiorennitad penala è la vegliadetgna, a partir da la quala ina persuna po vegnir chastiada per in'acziun che la lescha sancziunescha cun in chasti. La responsabladad penala cumenza en Svizra cun il 10avel anniversari. Uffants pli giuvens n'èn pia betg maiorens en il senn penal. Per decider, sch'i dovra ina reacziun sin in malfatg d'in uffant da main che 10 onns, èn cumpetents ils geniturs. Eventualmain po l'autoritad per la protecziun d'uffants ordinar ina mesira per la protecziun da l'uffant.

Educar avant che chastiar

Il dretg penal per giuvenils svizzer vul en emprima lingia proteger ed educar ils giuvenils. Perquai na vegnan els savens betg chastiads en il vair senn dal pled. Plitgunsch vegnan ordinadas mesiras educativas e/u terapeuticas. 

Furmas da sancziun

Il Dretg penal per giuvenils enconuscha duas furmas da sancziun: mesiras da protecziun e chastis.

Mesiras da protecziun

  • Surveglianza
  • Assistenza persunala
  • Tractament ambulant
  • Plazzament tar persunas privatas, en instituziuns educativas u en instituziuns da tractament

Chastis

  • Reprimanda
  • Prestaziun persunala: Durada maximala da princip 10 dis. Per giuvenils da 15 fin 18 onns che han commess in crim u in delict, po la prestaziun persunala durar fin 3 mais.
  • Multa fin 2000 francs: per giuvenils da 15 fin 18 onns
  • Detenziun
    • fin 1 onn: per giuvenils da 15 fin 18 onns che han commess in crim u in delict
    • fin 4 onns: per giuvenils da 16 fin 18 onns che han commess in grev crim

Denunziar insatgi

Sch'i vegn commess in malfatg, pon ins infurmar la polizia e far ina denunzia. L'emprim pon ins dumandar il sustegn e la cussegliaziun d'in post d'agid a victimas.

Ulteriuras infurmaziuns concernent il dretg penal per giuvenils chattais Vus sin la pagina d'internet da las autoritads federalas.