Las autoritads svizras online

directamain tar il cuntegn

Malsaun a l'exteriur – prestaziuns da las cassas da malsauns

Cas d'urgenza èn cuvrids

Sche Vus vegnis malsaun sin in viadi a l'exteriur, vegn pajà il tractament medical d'urgenza ch'è necessari. Betg surpigliads vegnan ils custs d'in tractament voluntar u da medicaments che vegnan cumprads a l'exteriur.

Remartgai per plaschair:

Sche Vus na survegnis betg ina malsogna acuta a l'exteriur, ma sche Voss medi As trametta per il tractament a l'exteriur perquai ch'il tractament na stat betg a disposiziun en Svizra, faschais Vus il meglier da sclerir precedentamain cun Vossa cassa da malsauns la cuvrida dals custs.

Dimensiun da la cuvrida dals custs en pajais da la UE/AECL

La summa dals custs che vegn cuvrida en cas d'urgenza dependa da la destinaziun dal viadi. En pajais da la UE/AECL avais Vus cun la carta europeica da l'assicuranza da malsauns che Vus avais survegnì da Vossa assicuranza da malsauns, il dretg da vegnir indemnisà per las medemas prestaziuns sco las persunas ch'èn assicuradas en il pajais respectiv. Prendai pia adina la carta d'assicuranza cun Vus en vacanzas!

Qua chattais Vus dapli infurmaziuns per persunas che fan viadis en pajais da la UE/AECL:

Dimensiun da la cuvrida dals custs ordaifer ils pajais da la UE/AECL

Ordaifer ils pajais da la UE/AECL As vegnan indemnisads ils custs per tractaments medicals d'urgenza fin maximalmain duas giadas l'import ch'il medem tractament avess custà en Svizra. Custs pli auts vegnan surpigliads da las assicuranzas supplementaras.

Assicuranza supplementara per viadis – cura?

Per viadis en tscherts pajais che n'èn betg commembers da la UE/AECL poi esser raschunaivel d'assicurar tar in'assicuranza da malsauns ina indemnisaziun pli auta dals custs da tractament a l'exteriur. Per exempel en ils Stadis Unids da l'America ed en Canada èn ils custs da sanadad auts – in tractament po pia svelt custar duas giadas tant sco en Svizra. A partir da quest import na paja la cassa da malsauns nagut pli.