Las autoritads svizras online

directamain tar il cuntegn

Cassa da malsaund - Assicuranzas supplementaras

Sche Vus vulais che la cassa da malsauns surpiglia prestaziuns che surpassan quellas da l'assicuranza fundamentala, porschan las assicuranzas differentas assicuranzas supplementaras. Vus pudais per exempel assicurar dapli prestaziuns medicalas ambulantas (correcturas dals dents per uffants, tractaments da la medischina cumplementara sco osteopatia) ubain dapli confort u libra tscherna dal medi en l'ospital.

Dapli libertad per la cassa da malsauns

Las assicuranzas supplementaras n'èn betg assicuranzas socialas. Ellas pon vegnir fatgas voluntarmain ed ellas n'èn betg obligadas – cuntrari a las cassas fundamentalas – d'As admetter a l'assicuranza giavischada. Ultra da quai pon las cassas colliar las premias cun Vossa vegliadetgna, cun Voss stadi da sanadad u cun Vossa schlattaina.

I vegn pretendì in questiunari da sanadad

Per l'admissiun ad in'assicuranza supplementara pretendan las cassas da malsauns che Vus emplainias in questiunari da sanadad. Tenor tge cundiziuns che Vus vegnis admess a l'assicuranza giavischada dependa da questas dumondas davart Vossa sanadad. Empleni il questiunari tenor meglier savair e pudair – la cassa da malsauns po numnadamain er revegnir pli tard a las cundiziuns da l'assicuranza u schizunt a l'admissiun a l'assicuranza, sche Vossas indicaziuns èn falladas.

Evitar resalvas, exclusiuns e questiunaris da sanadad

Sche Vus vulais far in'assicuranza supplementara per Voss uffant, faschai quai il meglier avant la naschientscha. Per l'annunzia prenatala garanteschan las cassas da malsauns savens in'admissiun senza cundiziuns e senza il questiunari da sanadad. Savens vegnan uffants assicurads supplementarmain per tractaments dals dents (correctura dals dents). Er questa assicuranza duai vegnir fatga a temp. A partir d'ina tscherta vegliadetgna pretendan las cassas da malsauns ina controlla dals dents precedenta.

Resguardar avant che far in'assicuranza

Las assicuranzas supplementaras na vegnan savens betg vendidas sco prestaziuns singulas, mabain en pachets. Sche Vus As decidais pia da far in'assicuranza supplementara, verifitgai che Vus na sajas betg assicurads duas giadas per ina prestaziun. En cas d'assicuranzas da viadi supplementaras (savens raschunaivlas, sch'ins fa viadis transatlantics) controllai, sche Vus n'essas betg gia assicurads sur la carta da credit, sur in carnet da viadi u sur ina chaussa sumeglianta.

Resguardar en cas d'ina desditga

Avant che desdir assicuranzas supplementaras existentas ponderai bain, sche Vus na duvrais u na vulais propi betg pli questas prestaziuns. Ina readmissiun a l'assicuranza supplementara correspundenta n'è numnadamain betg garantida (p.ex. perquai che Voss stadi da sanadad è sa pegiurà). As infurmai ultra da quai davart ils termins da desditga vertents.