Las autoritads svizras online

directamain tar il cuntegn

Quants daners survegn jau en la vegliadetgna?

A partir dal 64avel resp. dal 65avel onn da vegliadetgna survegnan dunnas ed umens en Svizra ina renta da la AVS. Vitiers vegnan prestaziuns da la prevenziun professiunala ed eventualmain da la prevenziun privata. La AVS, la prevenziun professiunala e la prevenziun privata èn las trais pitgas da la prevenziun svizra da vegliadetgna.

1. pitga: AVS

Quanta renta survegn jau da la AVS?

L'autezza da Vossa renta da la AVS dependa da plirs facturs:

  • dals onns da contribuziun
  • da l'autezza da las entradas
  • d'eventualas bunificaziuns d'educaziun e da tgira.

L'obligaziun da pajar contribuziuns a la AVS han ils patruns ed ils lavurants. Las contribuziuns vegnan deducidas directamain dal salari.
Ina renta cumplaina survegnan persunas che han ademplì l'entira obligaziun da pajar contribuziuns. Quai è il cas, sche Vus resp. Voss patrun ha pajà nuninterruttamain contribuziuns a la AVS tranter Voss 20avel onn da vegliadetgna e Vossa vegliadetgna da pensiun.

La renta maximala na dastga tras lescha betg esser pli che duas giadas pli gronda che la renta minimala.

Tge vala per conjugals?

Per conjugals vala la suandanta regla: Las entradas dals dus conjugals vegnan quintadas ensemen. Lura vegn ina mesadad attribuida ad in conjugal e l'autra mesadad a l'auter conjugal.

Las entradas vegnan partidas en questa moda:

  • sche tuts dus conjugals han il dretg d'ina renta da la AVS u da la AI;
  • sch'ina persuna vaiva ha il dretg d'ina renta da vegliadetgna;
  • sche la lètg vegn schliada tras divorzi.

La summa da las duas rentas singulas dals conjugals na dastga betg esser pli gronda che 150 pertschient da la renta maximala. Sche quest import maximal vegn surpassà, vegnan reducidas correspundentamain las duas rentas singulas.

Stoss jau spetgar fin a la vegliadetgna da pensiun?

La vegliadetgna da pensiun cumenza en Svizra per ils umens cun il 65avel anniversari e per las dunnas cun il 64avel anniversari. Igl è pussibel da retrair la pensiun da la AVS gia dus onns pli baud. Areguard la prevenziun professiunala èsi pussaivel da sa laschar pensiunar pli baud (il pli baud a partir dal 58avel onn da vegliadetgna). En cas d'in pensiunament anticipà vegn natiralmain reducida la renta.

La pensiun da la AVS po vegnir suspendida per almain in onn fin maximalmain 5 onns. Tras quai s’augmenta la pensiun per in supplement mensil. Ina suspensiun è er pussibla en la prevenziun professiunala. I dat numerusas variantas che han differentas consequenzas per las entradas. Il meglier è da sa laschar cussegliar da l'atgna cassa da pensiun.

Quant pudais Vus spetgar?

En l'internet pudais Vus far sez ina stimaziun da Vossa renta da vegliadetgna futura. Vus pudais er dumandar ina stimaziun gratuita tar Vossa cassa da cumpensaziun. En tuts dus cas sa tracti d'ina calculaziun provisorica. La renta da vegliadetgna po vegnir calculada en moda lianta pir, cur che la vegliadetgna da renta è cuntanschida.

La stimaziun online da l'autezza da mia renta da vegliadetgna futura

Dumonda per ina calculaziun da la renta

2. pitga: Prevenziun professiunala

La prevenziun professiunala è obligatorica per tut las lavurantas e tut ils lavurants. Ella cumenza cun l'entrada en la vita professiunala, il pli baud cun il 17avel anniversari. Quai, sche las entradas importan almain 21'330 francs. L'obligaziun da pajar contribuziuns a la AVS han ils patruns ed ils lavurants. Las contribuziuns vegnan deducidas directamain dal salari.

La renta dependa da las contribuziuns pajadas en il decurs da la vita professiunala. Ultra da quai valan las reglas da la cassa da pensiun respectiva. Tut las contribuziuns ensemen furman il dabun da vegliadetgna. Quel po vegnir sco renta u per part sco chapital.

La renta vegn calculada a maun da la "tariffa da conversiun". L'autezza minimala da questa tariffa è fixada tras lescha. Actualmain importa ella 6,8 pertschient (per umens e dunnas en la vegliadetgna da pensiun ordinaria da la AVS).

In exempel

Supposiziun: En il decurs da Vossa activitad da gudogn avais Vus acquistà in dabun da vegliadetgna da 400'000 francs. La tariffa da conversiun importa 6,8 pertschient. Vossa pensiun per vita duranta importa 27'200 francs per onn u 2'267 francs per mais.

3. pitga: Prevenziun privata

La 3. pitga èn ils respargns privats en vista a la vegliadetgna. Ils pajaments a la 3. pitga pon per part vegnir deducids da la taglia. La 3. pitga è facultativa.