Las autoritads svizras online

directamain tar il cuntegn

AVS per persunas cun activitad da gudogn independenta e per persunas senza activitad da gudogn

Persunas cun activitad da gudogn independenta

In'activitad da gudogn independenta en il senn da la AVS han da princip persunas che:

  • lavuran sut agen num e sin agen quint, e
  • han ina posiziun independenta e portan sez lur ristga economica.

Questas persunas n'èn betg suttamessas a l'obligatori da la prevenziun professiunala e ston er perquai quintar giu sezzas la AVS.

Calcular online las contribuziuns da la AVS da persunas cun activitad da gudogn independenta

Persunas senza activitad da gudogn

Contribuziuns

Persunas senza activitad da gudogn ston pajar contribuziuns a la AVS a partir dal 1. da schaner suenter ch'ellas han cumplenì 20 onns. L'obligaziun da pajar contribuziuns finescha, cur ch'ins cuntanscha la vegliadetgna ordinaria da pensiun (dunnas 64 onns, umens 65 onns). Sin la pagina d'internet da l'Uffizi federal d'assicuranzas socialas pon ins calcular online las contribuziuns.

Persunas senza activitad da gudogn èn persunas che n'han naginas u mo pitschnas entradas da gudogn, p.ex.:

  • persunas pensiunadas anticipadamain
  • persunas che lavuran a temp parzial
  • persunas che retiran rentas da la AI
  • persunas malsaunas che survegnan pajaments da diarias d’assicuranzas (tar accidents u malsognas)
  • persunas che na survegnan betg pli l'indemnisaziun da dischoccupaziun
  • persunas divorziadas u vaivas
  • e.u.v

Calcular online las contribuziuns da la AVS da persunas senza activitad da gudogn

Students

A partir dal 1. da schaner suenter ch'els han cumplenì 20 onns fin als 31 da december da l'onn ch'els cumpleneschan 25 onns ston students svizzers ed esters cun domicil en Svizra mo pajar contribuziuns da 478 francs per onn a la AVS, a la AI ed a la CG (contribuziun minimala).

Persunas pensiunadas anticipadamain

Mintgin sto pajar contribuziuns, fin ch'el cuntanscha la vegliadetgna da pensiun tenor la AVS (dunnas 64 onns, umens 65 onns). Persunas pensiunadas anticipadamain n'han bain betg pli entradas da gudogn, ston dentant tuttina pajar vinavant contribuziuns a la AVS – malgrà che lur consorta u consort u partenari u partenaria registrada lavuria anc e pajan contribuziuns d'almain 956 per onn a la AVS (inclusiv las contribuziuns dal patrun). Tgi che va anticipadamain en pensiun, sto s'annunziar tar la filiala da sia vischnanca da domicil sco persuna senza activitad da gudogn.