Las autoritads svizras online

directamain tar il cuntegn

Auto / permiss da manischar e midar chasa

Vus faschais midada entaifer Voss chantun u d'in chantun en in auter. En blers cas vegn er dischlocà in auto, dal qual las datas d'annunzia ston vegnir midadas e l'adressa en il permiss da manischar sto vegnir adattada.

Far midada entaifer il chantun

Sche Vus faschais midada, stuais Vus laschar adattar da l'uffizi per il traffic sin via da Voss chantun l'adressa a l'adressa nova en il permiss da manischar. L'adressa sto vegnir adattada entaifer 14 dis. Sche Vus faschais midada entaifer il chantun, dastgais Vus tegnair Voss numer d'immatriculaziun.

  • Vus possedais gia in nov permiss da manischar en il format da carta da credit? Alura po la nova adressa vegnir communitgada per telefon u en scrit a l'uffizi per il traffic sin via cumpetent.
  • Vus na possedais anc nagin permiss da manischar nov? Alura sto quel vegnir empustà en mintga cas. Resguardai per plaschair las infurmaziuns sut.

Far midada en in auter chantun

Vus faschais midada en in auter chantun? Alura As stuais Vus annunziar tar l'uffizi per il traffic sin via dal chantun da domicil nov entaifer 14 dis. Vus duvrais:

  • il formular emplenì "Annunzia per immatricular in vehichel",
  • il document dal vehichel vertent,
  • ina cumprova nova d'ina assicuranza da responsabladad (che Vus survegnis sin dumonda da Vossa societad d'assicuranza).

Tar l'nffizi per il traffic sin via da Voss nov chantun da domicil pudais Vus barattar Voss numers d'immatriculaziun vegls cunter novs. Sche Vus passais persunalmain, pudais Vus prender cun Vus ils numers d'immatriculaziun e dar giu els resp. barattar els al spurtegl. Ils documents pudais Vus er trametter a l'Uffizi per il traffic sin via. Ils numers d'immatriculaziun pon vegnir barattads tar l'uffizi postal da Vossa adressa d'abitar nova.

N'emblidai betg ch'ils pretschs pon variar da chantun a chantun.

Per manischunzs: Midadas en il permiss da manischar

Per possessurs d'in vehichel: Midadas en il document dal vehichel

Per possessurs d'in vehichel – supplementarmain en cas d'ina midada dal chantun: novs numers d'immatriculaziun