Il sistem dal provediment da vegliadetgna svizzer cumpiglia: il provediment dal stadi (1. pitga), il provediment professiunal (2. pitga) ed il provediment privat (3. pitga). Mintga pitga ha ses agen scopo.
L'emprima pitga (obligatorica) consista en emprima lingia da l’assicuranza per la vegliadetgna. Cun quella duai esser garantì che Vus hajas in'entrada minimala che cuvra ils custs da basa, cura che Vus cuntanschais la vegliadetgna da pensiun.
L’emprima pitga sa basa sin il princip da solidaritad: La populaziun ch'è activa en ina professiun paja las contribuziuns e finanziescha uschia las rentas da la populaziun pensiunada. Tgi che gudogna dapli, paja contribuziuns pli autas e sustegna uschia las persunas assicuradas cun entradas pli pitschnas che pajan contribuziuns pli bassas.
Grazia a l'assicuranza da survivents survegnis Vus er prestaziuns d’agid en cas che Voss um u Vossa dunna ubain in u tuts dus geniturs moran. Uschia duai vegnir impedì che Vus survegnias difficultads finanzialas.
Sche l’assicuranza per vegls e survivents (AVS) na tanscha betg per cuvrir ils custs da basa, èn previs en l’emprima pitga ulteriuras prestaziuns d’agid: las prestaziuns supplementaras.
Il provediment professiunal, er numnà cassa da pensiun u LPP, è obligatoric per ils pli blers che han in'activitad da gudogn. El cumplettescha la renta da la AVS e duai pussibilitar da mantegnair in standard da vita adequat er suenter il pensiunament.
L’import da l’emprima e da la segunda pitga As garantescha in’entrada che correspunda circa a 60 pertschient da l’entrada avant il pensiunament.
Cun la terza pitga avais Vus la pussaivladad da meglierar Vossa renta da vegliadetgna.
Cuntrari a las duas autras pitgas n’è la terza pitga betg obligatorica. I sa tracta d’ina assicuranza individuala e privata ch’è voluntaria. Vus pudais As laschar segirar durant che Vus avais in'activitad da gudogn e sche Vus vulais metter da la vart ulteriurs raps per il temp da pensiun.
En la broschura «Il provediment per la vegliadetgna en Svizra» da l’Uffizi federal d'assicuranzas socialas chattais Vus ulteriuras infurmaziuns en chaussa.
Ulteriuras infurmaziuns davart l’emprima pitga e davart la dumonda, tgi ch’è segirà ed a tge cundiziuns, chattais Vus sin la pagina Las contribuziuns a la AVS.
Ulteriuras infurmaziuns davart la segunda pitga e davart la dumonda, tgi ch’è segirà ed a tge cundiziuns, chattais Vus sin la pagina La segunda pitga.
Ulteriuras infurmaziuns davart la terza pitga e davart la dumonda, tgi ch’è segirà ed a tge cundiziuns, chattais Vus sin la pagina La terza pitga.