Assicuranza privata da responsabladad en Svizra

Da tge sa tracti?

Sche Vus faschais in donn ad in’autra persuna essas Vus obligada u obligà da far bun quai. Vus pudais far in’assicuranza privata da responsabladad che surpiglia ils custs en connex cun il donn.

L’assicuranza privata da responsabladad paja per exempel, sche Vus avais rut ils egliers d’ina amia, sche Vus avais blessà insatgi cun il velo u sche Voss chaun ha mors in uffant. Tut tenor la dimensiun dal donn po l’assicuranza privata da responsabladad As proteger d’ina gronda perdita finanziala.

En general è l’assicuranza privata da responsabladad voluntara en Svizra. Ella è dentant obligatorica, sche Vus vulais prender en locaziun in’abitaziun. Per possessuras e possessurs d’in chaun è l’assicuranza privata da responsabladad obligatorica en la gronda part dals chantuns.

En Svizra ston possessuras e possessurs d’in vehichel a motor (er per motos e per e-bikes svelts) plinavant far in’assicuranza da responsabladad per vehichels a motor.

Tge surpiglia l’assicuranza privata da responsabladad?

Per regla surpiglia l’assicuranza privata da responsabladad:

donns da persunas e da material,
perditas da facultad che resultan or da donns da persunas e da material (p.ex. cumpensaziun da paja per ina persuna blessada che na sa betg pli lavurar),
defensiun da pretensiuns nungiustifitgadas (p.ex. sche Vus n’essas betg responsabel per in donn).

Vus pudais eleger tranter in’assicuranza per persunas singulas ed in’assicuranza che includa ils auters commembers da la chasada. Ils donns che vegnan chaschunads d’animals da chasa èn per regla er inclus.

I dat differentas opziuns che Vus duessas discutar cun Vossa assicuranza sche Vus faschais in contract. Per exempel davart l’inclusiun da la ristga da chaschunar in donn durant manischar in vehichel ester.

Tge na surpiglia l’assicuranza privata da responsabladad betg?

L’assicuranza privata da responsabladad na surpiglia betg ils suandants donns:

donns che Vus chaschunais sco persuna assicurada a Vus sezza u sez u ad ina persuna che viva en Vossa chasada (donns da persunas possian pertutgar la cumpetenza da l’assicuranza d’accidents),
donns, che Vus chaschunais en il rom da Vossa activitad professiunala,
donns materials pervia d’isada, donns previsibels u donns che Vus avessas pudì prevesair,
donns en connex cun la transmissiun d’ina malsogna contagiusa,
donns che vegnan chaschunads en connex cun commetter intenziunadamain in delict u in crim.

Tge custa l’assicuranza privata da responsabladad?

Las premias dependan fitg da la summa assicurada, da la franschisa e da las ristgas garantidas dal contract d’assicuranza.

En Svizra recumondan las assicuranzas ina garanzia da 3 fin 20 milliuns francs. La franschisa – pia la summa che Vus stuais pajar sezza u sez en cas d’in donn – importa per regla 5000 francs.

Cumparegliai las purschidas da las differentas assicuranzas. En l’internet chattais Vus plirs offeriders che gidan a cumparegliar.

Betg scumbigliar cun l’assicuranza da mobigliar

Mintgatant vegnan l’assicuranza privata da responsabladad e l’assicuranza da mobigliar scumbigliadas, cunquai ch’ellas vegnan normalmain purschidas en cumbinaziun.

Cuntrari a l’assicuranza privata da responsabladad na paja l’assicuranza da mobigliar dentant betg per il donn che Vus faschais a terzas persunas. Ella surpiglia donns a l’inventari, pia a mobiglias, donns a la televisiun, a l’equipament da sport ed ad auter mobigliar en cas da fieu, eveniments da la natira (p.ex. stemprads), donns da l’aua ed enguladitsch cun infracziun.

L’assicuranza privata da responsabladad e l’assicuranza da mobigliar pudais Vus er far tar duas differentas assicuranzas.

Dapli infurmaziuns

Tschertga

Assicuranza privata da responsabladad