La quota d'agen chapital per finanziar in'atgna chasa u in'atgna abitaziun importa en Svizra normalmain almain 20 %. Vitiers vegnan ils custs accessorics da la cumpra sco er taglias e taxas per far la transacziun e per registrar la proprietad funsila tar las autoritads. Cun la glista da controlla da la pagina d'internet hausinfo.ch pudais Vus calcular Voss preventiv d'abitar.
Sche Vus avais fatg Voss preventiv d'abitar, stuais Vus preschentar 20 % dal pretsch da cumpra sco uschenumnads agens meds per che la banca As concedia in credit. Quai pon esser:
dabuns a la banca
vaglias
retratgas anticipadas da l'ierta, donaziuns che Vus avais survegnì
credits da persunas parentas ed enconuschentas
dabun da la cassa da pensiun: en cas d'ina finanziaziun tras ina ipoteca è la premissas ch'ina quota minimala da 10 % dals agens meds na deriva betg dal dabun da la cassa da pensiun
dabuns da la pitga 3a
e.u.v.
La part la pli pitschna da la populaziun po cumprar ina immobiglia cun agens meds e dumonda perquai ina ipoteca d'in institut da finanzas, pia in credit da lunga vista, per il qual i vegn pajà in tschains ed il qual vegn segirà cun l'object d'abitar sco pegn:
L'emprima ipoteca po importar per regla fin ca. 65 % da la valur.
Sche quai na basta betg per la finanziaziun, po vegnir emprestada ina segunda ipoteca fin a l'autezza dad 80 % q.v.d. per ulteriurs 15 %. Perquai che la ristga è pli gronda incassescha la gronda part da las bancas in tschains pli aut per la segunda ipoteca.
Ulteriuras infurmaziuns chattais Vus sin la pagina d'internet da hausinfo.ch.