Mintga persuna cun dretg da votar en Svizra po far in referendum facultativ, er sch'ella viva a l'exteriur. Ella na sto betg esser commembra d'in comité, ma ina tala commembranza facilitescha la lavur.
Avant che lantschar in referendum, As drizzai per plaschair a la Chanzlia federala. Ella As dat tut las infurmaziuns necessarias davart il proceder.
Chanzlia federala
Chasa federala vest
3003 Berna
Tel. +41 58 462 21 11
info@bk.admin.ch
Tgi che vul far in referendum, po furmar in comité da referendum. Quai n'è però betg obligatoric. Las persunas che vulan lantschar in referendum han la pussaivladad d'entrar en contact cun la Chanzlia federala. Il meglier fan ellas quai gia durant la sessiun, en la quala l'Assamblea federala deliberescha il relasch respectiv. Uschia sa laschan sclerir a temp dumondas formalas e giuridicas. Cunter la medema lescha u il medem conclus dal parlament pon pliras gruppaziuns far in referendum. Las suttascripziuns rimnadas vegnan quintadas ensemen.
Avant ch'il dretg contestà u il conclus contestà vegn publitgà en il Fegl uffizial federal, preparan las persunas che vulan lantschar il referendum las glistas da suttascripziun. Sin dumonda las metta la Chanzlia federala a disposiziun musters per questas glistas da suttascripziun. Questas glistas ston cumpigliar obligatoricamain tschertas indicaziuns, en spezial il titel exact dal dretg contestà u dal conclus contestà e la data da la deliberaziun en l'Assamblea federala (guardar qua sutvart). Sche las persunas che fan il referendum vulan quai, pon ellas laschar examinar las glistas da suttascripziun da la Chanzlia federala.
Cumenzar a rimnar suttascripziuns dastgan ins pir, cura che la lescha contestada u il conclus contestà è publitgà en il Fegl uffizial federal. A partir da quest mument han ils comités temp 100 dis da rimnar las 50 000 suttascripziuns necessarias, da las laschar attestar da las vischnancas e da las inoltrar a la Chanzlia federala. Tenor las experientschas n'èn betg tut las suttascripziuns valaivlas. I vegn perquai recumandà da rimnar dapli che 50 000 suttascripziuns. Ins sto er resguardar che l'examinaziun da las suttascripziuns chaschuna blera lavur e che las vischnancas dovran in tschert temp per far quai. La controlla tras las vischnancas po durar in tschert temp. Perquai vegni cusseglià da pensar a temp a quest fatg e d'inoltrar regularmain las suttascripziuns, per ch'il termin da 100 dis possia vegnir resguardà.
Il referendum è reussì, sche almain 50 000 suttascripziuns valaivlas èn vegnidas inoltradas a la Chanzlia federala. Quella examinescha sco ultima instanza la valaivladad da las suttascripziuns. Sch'i èn vegnidas rimnadas avunda suttascripziuns valaivlas, vegn il relasch contestà suttamess al pievel per ina votaziun dal pievel.
Sche las auturas ed ils auturs d'in referendum han rimnà avunda suttascripziuns valaivlas, alura sto il sboz da la lescha vegnir suttamess a la votaziun dal pievel. La lescha na fixescha betg il termin.
