Burgaisas e burgais dals stadis da la UE e da la AECL (Islanda, Liechtenstein, Norvegia, Svizra) na dovran nagina permissiun per entrar en Svizra.

Sche Vus vegnis d’in auter pajais, dependi da Vossa naziunalitad. Sche Vus duvrais in visum, mussa la survista da las prescripziuns per documents d’identitad e per visums tenor naziunalitad dal Secretariat da stadi per migraziun.

La Svizra fa part dal spazi da Schengen.* Sche Vus possedais in visum d’in stadi da Schengen, na duvrais Vus per regla nagin visum turistic supplementar per entrar en Svizra u en auters stadis da Schengen. Entaifer ina perioda da 180 dis na dastga Vossa dimora dentant betg durar pli ditg che 90 dis.

Sche Vus disponis d’ina da las suandantas permissiuns da dimora, na duvrais Vus nagin visum per ina dimora en Svizra u en in’auter stadi da Schengen durant maximalmain 90 dis entaifer ina perioda da 180 dis –  independentamain da Vossa naziunalitad:

• legitimaziun B (permissiun da dimora)

• legitimaziun C (permissiun da domicil)

• legitimaziun L (permissiun da dimora curta)

• legitimaziun Ci (permissiun da dimora cun activitad da gudogn)

• carta da legitimaziun dal DFAE
  

* Ils suandants 26 stadis èn actualmain stadis da Schengen:
Austria, Belgia, Danemarc, Estonia, Finlanda, Frantscha, Germania, Grezia, Islanda, Italia, Lettonia, Liechtenstein, Lituania, Luxemburg, Malta, Norvegia, Pajais Bass, Pologna, Portugal, Slovachia, Slovenia, Spagna, Svezia, Svizra, Tschechia, Ungaria.

Emplenir in formular da dumonda

I dat dus tips da formulars per dumandar in visum.

Dimora fin maximalmain 90 dis / visum C: Per ina dimora p.ex. per motivs turistics, per visitar la parentella, per far in studi u per As participar ad occurrenzas culturalas e sportivas stuais Vus emplenir ina dumonda da visum da Schengen (u in visum C). Quel vala per tut il spazi da Schengen. En cas che Vus vulais lavurar en Svizra, stuais Vus ultra da quai dumandar ina permissiun da lavur.

Dimora per pli che 90 dis / visum D: Vus stuais emplenir il formular da dumonda per in visum naziunal D.

Inoltrar la dumonda

Per ina dimora en Svizra sto la dumonda da visum vegnir inoltrada a l’ambassada svizra u al consulat svizzer. Quai faschais Vus il meglier almain dus mais avant il viadi, dentant betg pli baud che sis mais avant il viadi.

En tscherts cas pudais Vus er inoltrar la dumonda da visum en l’internet sur il sistem da visums online.

Per ina dimora en in stadi ester sto la dumonda da visum vegnir inoltrada al consulat u a l’ambassada dal pajais da destinaziun.

Documents supplementars

Tut tenor Voss pajais d’origin po la represchentanza svizra pretender da Vus ulteriurs documents avant ch’ella emetta in visum, er sch’i sa tracta mo d’in visum turistic.

1. Brev d’invit
   Quest document sto esser scrit per tudestg, franzos u talian ed attestar ch’ina ospitanta u in ospitant (persuna privata, interpresa) As spetga. Ella sto cuntegnair tut las indicaziuns davart la durada e davart il motiv da la dimora, Vossas datas persunalas cumplettas (num, prenum, data da naschientscha, naziunalitad) sco er las indicaziuns da l’ospitanta u da l’ospitant. L’ospitanta u l’ospitant sto datar e suttascriver la brev. Ulteriuras infurmaziuns chattais Vus sin il fegl d’infurmaziun davart la brev d’invit.

2. Decleraziun d’obligaziun
   Sche la represchentanza svizra dubita che Vus hajas avunda daners per il viadi, po ella consegnar ina decleraziun d’obligaziun. Cun questa decleraziun sto Vossa ospitanta u Voss ospitant s’obligar da surpigliar custs betg garantids da fin 30 000 francs en connex cun Voss viadi. Ella u el sto inoltrar la decleraziun suttascritta a sia vischnanca da domicil u a l’autoritad da migraziun chantunala. Ulteriuras infurmaziuns chattais Vus sin il fegl d’infurmaziun davart la decleraziun d’obligaziun. 

3. Assicuranza da malsauns per viadis
   Per in visum da dimora curta (maximalmain 90 dis) stuais Vus per regla attestar che Vus hajas in’assicuranza da malsauns per viadis che surpiglia custs d’almain 30 000 euros. L’assicuranza sto vegnir fatga tar ina societad d’assicuranzas renconuschida dal consulat u da l’ambassada che tracta Voss visum.

• In visum per persunas creschidas custa 80 euros.

• In visum per uffants (6–12 onns) custa 40 euros.

• Per uffants sut 6 onns è il visum gratuit.
  

En tscherts cas pon ils custs dal visum vegnir reducids u relaschads cumplettamain. Per in visum naziunal D (necessari per ina dimora da pli che 90 dis) pon ils custs vegnir augmentads per 50 %.

Sche Vus avais pers Voss document da viadi, stuais Vus annunziar quai immediatamain a la polizia da Voss lieu da dimora. Sche Vus pudais preschentar ina copia da Voss document da viadi po quai accelerar la procedura.

Las infurmaziuns davart la procedura en cas d’ina perdita dal document da viadi chattais Vus sin in fegl d’infurmaziun. Là vegnis Vus er a savair, tge che Vus stuais far per remplazzar Voss visum pers.