Sche Vus vulais manischar in auto, ina moto, in char annex, ina rulotta, in auto da furniziun u in campader (fin 3,5 tonnas) sin las autostradas e las autovias svizras, duvrais Vus ina vignetta d'autostrada.
Vus stuais tatgar si la vignetta en in lieu bain visibel endadens dal paravent. Tar vehichels senza vaider, per exempel tar in char annex, sto la vignetta vegnir tatgada vid ina part dal vehichel visibla e betg remplazzabla.
Per plaschair resguardai:
Vehichels grevs (dapli che 3,5 tonnas) na dovran nagina vignetta, mabain pajan ina taxa speziala sin il traffic da camiuns pesants.
La vignetta svizra d'autostrada custa 40 francs per onn.
La vignetta d’autostrada 2023 è valaivla dal 1. da december 2022 fin ils 31 da schaner 2024.
I na dat naginas vignettas dal di, da l’emna u dal mais.
Actualmain na datti anc nagina vignetta electronica. Igl è previs d’introducir la vignetta electronica (e-vignetta) en il decurs da l’onn 2023. Ella po lura vegnir retratga sur ina butia online da l’Uffizi federal da la duana e da la segirezza dals cunfins.
Per plaschair resguardai: Sche Vus manischais senza vignetta, survegnis Vus ina multa (200 francs) e stuais supplementarmain cumprar la vignetta (40 francs).
En Svizra
En Svizra pudais Vus cumprar la vignetta d'autostrada als tancadis, als spurtegls da posta e tar ils posts da duana als cunfins. Vus la pudais er retrair online sin la pagina d’internet da la Posta.
A l’exteriur
Vus pudais retrair la vignetta d'autostrada svizra gia avant che Vus entrais en Svizra sur posts da vendita elegids u la cumprar online.
Sche la vignetta n’è betg pli valaivla, la pudais Vus allontanar al paravent – il meglier cun ina nizza da far la barba e cun in pau pazienzia.
Sche Vus avais tatgà la vignetta sin il vehichel, na dastgais Vus en mintga cas betg prender davent ella e collar sin in auter vehichel. Quai n’è gnanc lura permess, sche l’auter vehichel è Voss agen ed er betg en cas da numers d'immatriculaziun transferibels.
Infurmaziuns detagliadas davart las vias e davart l'obligaziun da cumprar ina vignetta chattais Vus sin la suandanta pagina: Carta da las autostradas e da las autovias en Svizra.
Per ulteriuras dumondas u infurmaziuns supplementaras davart la vignetta d'autostrada consultai la pagina cun las indicaziuns da contact da l’autoritad responsabla e cun las dumondas frequentas (FAQ) davart la vignetta.