Las autoritads svizras online

directamain tar il cuntegn

Viagiar a l'exteriur

Tge documents dovr jau per mes viadi? Basta ina carta d'identitad u dovr jau in passaport valaivel ed eventualmain in visum?

Vus essas Svizra u Svizzer

Sco Svizra u Svizzer na duvrais Vus betg in visum per entrar en in stadi da la UE/AECL. In passaport valaivel u ina carta d'identitad valaivla bastan da princip. Tut tenor las disposiziuns pudais Vus er entrar en in stadi da la UE/AECL cun in passaport ch'è scadì. En cas da dubi As drizzai a la represchentanza estra.

Stadis che n'èn betg commembers da la UE/AECL pretendan in passaport valaivel u ina carta d'identitad valaivla che duess valair sur la data da Voss return or (p.ex. almain 6 mais sur la data dal return or). Mintgatant duvrais Vus in visum sco er ulteriurs documents da viadi (p.ex. cumprova da l'assicuranza da malsauns e.u.v.). 

Contactai per ulteriuras infurmaziuns las represchentanzas estras en Svizra. Inditgai en Vossa dumonda exactamain il tip da Voss documents da viadi (carta d'identitad, passaport provisoric, passaport normal cun o senza biometria) e lur durada da valaivladad. Forsa po er Voss biro da viadi sclerir Vossas dumondas. Resguardai ch'il permiss da manischar n'è betg in document da viadi renconuschì.

Viadi cun in uffant minoren

I po capitar ch’in uffant viagescha sulet, accumpagnà dad ina persuna che n’è betg ses represchentant legitim ubain dad in da ses geniturs che n’ha betg il medem num da famiglia. Mintga pajais ha sias atgnas leschas concernent las premissas per entrar e las premissas da dimora. Las infurmaziuns davart las disposiziuns valaivlas e davart ils visums vegnan messas a disposiziun da las ambassadas e dals consulats dals pajais da destinaziun.

L’ambassada u il consulat dal pajais da destinaziun po respunder a Vossa dumonda. Attenziun, tschertas disposiziuns valan er tar in transit. Ins sto pia contactar ils pajais da destinaziun er sch’igl ha lieu in transit.

Represchentanzas estras en Svizra

Vus essas burgaisa estra u burgais ester cun domicil en Svizra

Persunas estras d'in stadi da la UE/AECL

In document da viadi valaivel (passaport, passaport provisoric, carta d'identitad u document persunal) basta per viagiar en stadis da la UE/AECL. Per viadis en stadis ordaifer la UE/AECL As infurmai tar las represchentanzas respectivas en Svizra davart las prescripziuns da viadi valaivlas.

Represchentanzas estras en Svizra

Persunas estras da stadis che n'èn betg commembers da la UE/AECL – viadis entaifer il spazi da Schengen

Burgaisas e burgais da terzs stadis ch'èn en possess d'in document svizzer da legitimaziun da persunas estras B, C, L e Ci valaivel èn deliberads da l'obligaziun d'avair in visum per visitar il spazi da Schengen (fin a 90 dis per ina perioda da 180 dis). Avair cun sai ston ins stringentamain il titel svizzer da dimora valaivel ed in document da viadi valaivel (passaport da la patria u document da viadi svizzer per persunas estras).

Quai na vala dentant betg per la Gronda Britannia, l'Irlanda, la Cipra, la Bulgaria, la Rumenia e la Croazia che na fan betg part dal spazi da Schengen. Per viadis en quests stadis dovran ins eventualmain in visum.

Controllai mintgamai cun la represchentanza estra en Svizra, tge documents da viadi ch'èn necessaris: p.ex. passaport (eventualmain valaivel 6 mais sur la data dal return or), visum, cumprova da l'assicuranza da malsauns, ulteriurs documents da viadi. Eventualmain po Voss biro da viadi gidar a sclerir questas dumondas.

Resguardai: Ni il document svizzer da legitimaziun F ni il document da legitimaziun N n'autorisescha da viagiar en il spazi da Schengen, er betg cun in document da viadi valaivel.

Represchentanzas estras en Svizra

Persunas estras da stadis che n'èn betg commembers da la UE/AECL – viadis ordaifer il spazi da Schengen

Controllai mintgamai cun la represchentanza estra, tge documents da viadi ch'èn necessaris: p.ex. passaport (eventualmain valaivel 6 mais sur la data dal return or), visum, cumprova da l'assicuranza da malsauns, ulteriurs documents da viadi. Eventualmain po Voss biro da viadi gidar a sclerir questas dumondas.

Represchentanzas estras en Svizra