Las autoritads svizras online

directamain tar il cuntegn

Sche Vus vendais Vossa chasa u Vossa abitaziun

Vender la chasa, l'abitaziun u in bain immobigliar

Vender tras in agent

Sche Vus surdais la vendita ad in agent e sch'el As intermediescha in cumprader, stuais Vus pajar per regla in onurari da 2-3 % dal pretsch da vendita. Sche Vus chattais sez in cumprader, stuais Vus pajar a l'agent incumbensà in onurari da perdita che vegn fixà en il contract (per regla 0,5 % dal pretsch da vendita).

Responsabladad tar la vendita

Sco vendider stuais Vus render attent a mancanzas che Vossa chasa u Vossa abitaziun ha. Sch'il vendider po numnadamain cumprovar che Vus avais taschentà sapientivamain las mancanzas, pudais Vus vegnir obligà da star bun.

Taglia sin il gudogn tras la vendita da bains immobigliars

Tgi che venda ina chasa, in'abitaziun u in bain immobigliar, sto suttametter a la taglia il gudogn ch'el obtegna. Ulteriuras infurmaziuns davart la taglia sin il gudogn tras la vendita da bains immobigliars chattais Vus sin la pagina correspundenta da ch.ch.

Regalar ina chasa u in'abitaziun

En cas d'ina donaziun sto eventualmain vegnir pajada ina taglia. Ulteriuras infurmaziuns davart la taglia sin donaziuns chattais Vus sin la pagina correspundenta da ch.ch.

Reglar l'ierta

Igl è raschunaivel da fixar gia durant la vita tge che capita cun Voss possess suenter Vossa mort – pia per exempel cun in bain immobigliar. Infurmaziuns davart l'ierta, il testament, in contract d'ierta u ina donaziun chattais Vus sin la pagina d'internet correspundenta da ch.ch.