Las autoritads svizras online

directamain tar il cuntegn

Cumpra – Poss jau restituir in product, sch'el na ma plascha betg?

Vus cumprais gugent online u en affars. Ma tge pudais Vus far, sch'in product n'As plascha betg?

En Svizra na datti – cun excepziun da las uschenumnadas venditas da porta a porta – nagina regulaziun legala che As permetta da pretender da pudair barattar u da pudair restituir in product e da survegnir enavos il pretsch da cumpra mo perquai ch'il product n'As plascha betg u betg pli. Blers vendiders As dattan dentant da sai anora la pussaivladad da restituir u da barattar in product entaifer in termin fixà.

Restituir in product e survegnir enavos ils daners en cas d'ina cumpra en in affar

Sche Vus cumprais in product en in affar, As infurmai avant la cumpra davart las cundiziuns vertentas da vendita. Mintga affar po numnadamain fixar sias atgnas reglas. Las infurmaziuns correspundentas chattais Vus en spezial, sche Vus consultais las cundiziuns generalas da fatschenta u sche Vus As infurmais tar il persunal da vendita. Uschia vegnis Vus per exempel a savair, sche ed entaifer tge termin che Vus pudais restituir in t-shirt che n'As va betg bain.

Sche l'affar accepta la restituziun da products, As infurmai davart la dumonda, co che Vus survegnis enavos ils daners. Savens As offran affars numnadamain in bon en la valur da la rauba restituida. Sch'i n'è betg previs en las cundiziuns da vendita da returnar il pretsch da cumpra, stuais Vus As cuntentar cun quest bon.

Dretg da restituziun en cas da la cumpra via internet

Restituir in product e survegnir enavos ils daners en cas d'ina cumpra en l'internet

En cas d'ina cumpra en l'internet na prevesa il dretg svizzer nagin dretg da revocaziun, cuntrari al dretg da l'Uniun europeica. Il commerziant en l'internet po dentant conceder in tal dretg da revocaziun en sias cundiziuns generalas da fatschenta. Impurtant da savair èsi ch'ina adressa d'internet cun la finiziun .ch po er vegnir acquistada d'ina interpresa che n'ha betg sia sedia en Svizra. Sche Vus visitais ina pagina cun la finiziun .ch, na vul quai betg dir exnum, che Vus visitais ina pagina d'internet d'ina interpresa cun sedia en Svizra.

Uffizi federal per dumondas dal consum – Dumondas frequentas (FAQ)