Las autoritads svizras online

directamain tar il cuntegn

Access a prestaziuns

ch.ch fa part dad e-government Svizra. Cun il portal mussa la Chanzlia federala co che l’access dal public a prestaziuns electronicas da las autoritads po vegnir meglierà.

ch.ch fa part da las prestaziuns strategicas dad e-government «Access a prestaziuns electronicas da las autoritads». Tge munta quai exact?

Per adina dapli affars cun las autoritads na ston las burgaisas ed ils burgais betg pli ir en chasa communala. Els pon sa procurar infurmaziuns e far dumondas cumadaivlamain a partir da l’agen dachasa. Grazia a l’internet èsi er daventà pli simpel d’emplenir la decleraziun da taglia. Il chavazzin latiers sa numna «e-government».

Las burgaisas ed ils burgais ston pudair chattar, chapir ed utilisar las purschidas digitalas.

Per che e-government funcziuneschia, ston esser ademplidas duas chaussas:

  • Las autoritads ston metter a disposiziun infurmaziuns, formulars ed applicaziuns sin ina pagina d’internet.
  • Las burgaisas ed ils burgais ston chattar las purschidas en l’internet. Els ston chapir quellas, per ch’els sappian far diever da la purschida.

Oz na concordan la purschida digitala e la dumonda betg optimalmain. Quai mussan enquistas. E-government Svizra ha per quest motiv incumbensà la Chanzlia federala da meglierar l’access a las prestaziuns per las burgaisas ed ils burgais.

La finamira è:

La populaziun svizra, Svizras e Svizzers a l’exteriur sco er interessentas ed interessents da l’ester duain esser abels da chattar e d’utilisar infurmaziuns e prestaziuns en moda simpla e senza enconuscher las cumpetenzas da las autoritads.

Promover la collavuraziun

Meglieraziuns na pon betg vegnir cumandadas da surengiu en Svizra. Ils pass ils pli impurtants per optimar l’access èn uschia per la Chanzlia federala:

  • la collavuraziun stretga da las persunas ch’èn responsablas per ils portals dad e-government en las vischnancas, en ils chantuns e tar la Confederaziun;
  • l’orientaziun als usits ed als basegns da las utilisadras e dals utilisaders

Per rinforzar la collavuraziun envida la Chanzlia federala las persunas dal fatg da la Confederaziun, dals chantuns e da las vischnancas mintga onn ina fin duas giadas ad ina «conferenza d’access». Sin il blog www.blog.ch.ch scrivan persunas dal fatg da la Confederaziun, dals chantuns e da las vischnancas davart experientschas, occurrenzas e projects.