Las autoritads svizras online

directamain tar il cuntegn

Èn Vossas cartas da banca adina protegidas bain?

Vus duvrais Vossa carta da banca per far cumpras, per pajar sur l'internet u per retrair daners dal bancomat ... Ma essas Vus adina precaut avunda?

Pajar en moda segira sur l'internet

Avant che Vus pajais sur l'internet: Controllai che Vus duvrais per far quai ina colliaziun d'internet segira. Dus elements As permettan d'identifitgar ina transmissiun segira sur l'internet:

  • Pitschen simbol en furma d'in marschlos serrà u d'ina clav.
  • L'adressa mida da «http» a «https». Quai signifitga che Vossas datas vegnan silsuenter transmessas en furma criptada.
Pajar en moda segira sur l'internet
  • Cumprai mo da vendiders identifitgabels cleramain che Vus enconuschais u che As èn vegnids recumandads.
  • Legiai las cundiziuns generalas da vendita sin la pagina d'internet (sch'ellas mancan u sch'ellas èn zuppadas, n'è quai betg in bun segn ...).
  • Legiai attentamain las indicaziuns davart l'utilisaziun da Vossas datas persunalas.
  • Mettai adina en salv ina copia sin palpiri u ina copia da segirezza electronica da Vossa empustaziun e da las disposiziuns da contract las pli impurtantas (annullaziun, revocaziun, restituziun, garanzias).

I dat paginas d'internet enconuschentas per pajaments segirs via internet, per exempel Paypal u Skrill. Faschai tuttina attenziun e resguardai las suandantas infurmaziuns. 

 

Tips per duvrar en moda segira Vossas cartas

Resguardai ils suandants tips pratics per duvrar en moda segira Vossas cartas da banca e da credit:

  • Tegnai secret Voss code da PIN: Na tegnai betg en salv il code ensemen cun la carta. Na scrivai betg si il code, al tegnai en memoria e na faschai a savair el a nagin.
  • Na tscherni betg in code da PIN simpel che po vegnir eruì facilmain sco p.ex. Vossa data da naschientscha.
  • Endatai Voss code al bancomat senza ch'insatgi al po vesair.
  • Sche Vus pajais cun la carta, cuvri la tastatura cun Voss maun per che l'endataziun dal code na possia betg vegnir filmada.
  • N'emblidai betg la retschavida da Vossa carta da credit.
  • N'As laschai betg disturbar.
  • Refusai l'agid da persunas nunenconuschentas, sche Vossa carta è bloccada.
  • Laschai immediatamain bloccar Vossa carta, sche Vus constatais irregularitads.
  • Sajas precaut cun render enconuschentas las datas persunalas da Vossa carta da credit. Na communitgai mai questas datas per posta u per e-mail.

Centrala d'annunzia e d'analisa per la segirezza da l'infurmaziun – MELANI

Ristgas en l'internet – purschiders online per prestaziuns da servetschs finanzials