Las autoritads svizras online

directamain tar il cuntegn

Jau hai debits: Tge consequenzas ha quai?

Vus essas ina persuna natirala, Vus n'avais fatg nagina opposiziun cunter l'avis da pajament u Vossa opposiziun è vegnida annullada e Vus na pajais betg l'import pretendì entaifer il termin che As è vegnì fixà (q.v.d. entaifer 1 onn a partir dal 20avel di suenter l'entrada da l'avis da pajament). Sche tut quests puncts èn il cas per Vus, po l'uffizi da scussiun ordinar la sequestraziun da Vossas valurs da facultad e da Vossas entradas per amortisar il debit.

Sut las medemas circumstanzas ordinescha l'uffizi da concurs il concurs, sch'i sa tracta d'ina persuna ch'è inscritta en il register da commerzi (persuna giuridica).

Valurs da facultad sequestrablas

Per regla pon las suandantas valurs da facultad vegnir sequestradas:

  • il salari
  • las entradas da persunas cun activitad da gudogn independenta
  • l'indemnisaziun da dischoccupaziun
  • rentas e prestaziuns da chapital da la prevenziun professiunala (2. e 3.pitga)
  • immobiglias
  • valurs da facultad mobilas, da las qualas la valur è pli gronda ch'ils custs d'utilisaziun (autos, cliniez, maletgs e.u.v.)

Tenor la lescha sto la sequestraziun dal salari vegnir communitgada al patrun. In'eventuala divergenza da questa regla sto vegnir fixada cun l'uffizi da scussiun.

Valurs da facultad betg sequestrablas (glista betg cumpletta)

  • rentas da la AVS e da la AI
  • prestaziuns supplementaras
  • prestaziuns da la cassa da cumpensaziun per famiglias 
  • sustegn da cassas d'agid, da malsauns e da provediment
  • rentas, cumpensaziuns en chapital ed autras prestaziuns che vegnan pajadas a la victima u a ses confamigliars per ina blessura corporala, per in disturbi da la sanadad u per il mazzament d'in uman
  • ils objects ch'èn indispensabels per il diever persunal (vestgadira, apparats da chasa, mobiglias e.u.v.)
  • ils objects ch'èn indispensabels per pratitgar la professiun

Il minimum d'existenza en Svizra

En cas d'ina sequestraziun dal salari ha la debitura u il debitur il dretg da quella part dal salari che garantescha ad ella u ad el ed a sia famiglia il minimum d'existenza. Quest import vegn fixà sin basa da la situaziun persunala e famigliara da la debitura u dal debitur e sin basa da las directivas federalas.

Actualmain sa chatta il minimum d'existenza tar:

  • Fr. 1200.– per persunas singulas
  • Fr. 1350.– per ina chasada d'in genitur cun in u plirs uffants
  • Fr. 1700.– per conjugals, per partenadis registrads u per pèrs che vivan en il concubinat e che han uffants cuminaivels
  • Fr. 850.– per persunas che vivan en il concubinat senza uffants (sche tuts dus van a gudagnar) 
  • Fr. 400.– per mintga uffant fin a 10 onns
  • Fr. 600.– per mintga uffant sur 10 onns u en scolaziun

Vitiers il minimum d'existenza vegnan las expensas fixas ch'èn cumprovadamain indispensablas per surviver. Tranter auter èn quai las suandantas expensas:

  • Locaziun
  • Custs accessorics (stgaudament e.u.v.)
  • Premias per l'assicuranza obligatorica da malsauns, custs regulars dal medi
  • Taxas ed expensas per la scola
  • Expensas che han in connex cun l'execuziun da la professiun, p.ex. custs da transport/auto, expensas per pasts ordaifer, contribuziuns socialas da persunas cun activitad da gudogn independenta
  • Contribuziuns da mantegniment
  • Custs per la tgira d'uffants
  • Ulteriurs custs necessaris (custs per far midada ...)

Poss jau deducir ils debits en la decleraziun da taglia?

Ils debits dastgan vegnir deducids da la facultad, sch'i vegn inditgà precisamain tgi ch'è la creditura u il creditur. Percunter na dastgan rembursaments betg vegnir deducids da las entradas.

Ulteriuras consequenzas

Adina pli savens vegn pretendida ina cumprova da la solvenza, sch'ins vuless far in contract da locaziun, da leasing u in abunament da telefon u sch'ins vuless survegnir in credit da la banca e.u.v. Debits pon impedir da survegnir talas prestaziuns.

Responsabladad

Geniturs na stattan betg bun per ils debits da lur uffants, e quai er betg, sch'els han approvà la fatschenta che lur uffant ha fatg, per exempel la cumpra d'in computer. Ils geniturs ston mo lura star bun (responsabladad solidarica), sch'els èn s'obligads expressivamain da far quai.  

Tar ina persuna maridada u tar ina persuna en in partenadi registrà sto la dumonda, tgi che stat bun per ils debits, vegnir distinguida da la dumonda, cun tge valurs da facultad ch'ella stat bun per ils debits fatgs:

Tgi stat bun

Ina persuna na stat da princip betg bun per ils debits da sia conjugala u da ses conjugal resp. da sia partenaria registrada u da ses partenari registrà. Ina responsabladad solidarica exista mo, sche:

  • la persuna è s'obligada expressivamain, per exempel, sche omadus conjugals resp. partenarias u partenaris registrads han suttascrit il contract da credit, u
  • i sa tracta da debits per ils basegns currents da la famiglia resp. da la cuminanza, per exempel da victualias, da pitschnas reparaturas e da chaussas sumegliantas.

Cun tge valurs da facultad vegni stà bun

Per debits envers terzas persunas stat bun ina persuna maridada cun sia atgna facultad, sch'ils conjugals èn suttamess a l'urden dals bains ordinari da la participaziun als acquists, che vala per la maioritad dals conjugals, u a la separaziun dals bains. Sch'ils conjugals èn suttamess a l'urden dals bains, tschernì da rar, da la cuminanza dals bains, distingua il dretg dals bains matrimonials debits cumplains, dals quals fan part mo paucs debits enumerads en la lescha, ed agens debits. En cas d'ina cuminanza dals bains stat bun quel conjugal che ha fatg ils debits, e quai betg mo cun sia atgna facultad, mabain er cun ils bains cuminaivels (debits cumplains) resp. cun la mesadad da quels (agens debits), uschia ch'er las valurs da facultad da quel conjugal che n'ha betg fatg ils debits, las qualas sa chattan en ils bains cuminaivels, pon star bun.

Per persunas en in partenadi registrà, che – sch'ellas n'han betg disponì autramain – èn suttamessas ad in sistem da dretg da facultad che correspunda a la separaziun dals bains dal dretg matrimonial, valan las indicaziuns davart ils conjugals tenor il senn.