Las autoritads svizras online

directamain tar il cuntegn

S'infurmar davart terren da construcziun e davart in bain immobigliar

Plan da zonas ed urden da construcziun

Sin il plan da zonas vesais Vus, tge parcellas che pon vegnir duvradas sco terren da construcziun per ina chasa. Il plan da zonas da las vischnancas differenziescha en spezial zonas da construcziun, d'agricultura e da protecziun. Sche Vus vulais savair, sche Voss bain immobigliar po vegnir surbajegià tenor Voss giavischs, stuais Vus consultar ultra da quai l'urden da construcziun.

Prender invista dal plan da zonas

Register funsil

Il register funsil infurmescha tranter auter davart las dumondas, tgi ch'è proprietari d'in bain immobigliar, sche anc autras persunas han dretgs vi dal bain immobigliar (per exempel il dretg er da duvrar vias u access) e sch'il bain immobigliar è engrevgià cun dretgs da pegn. Las datas dal register funsil pon vegnir consultadas. Tgi che po cumprovar in interess, survegn er infurmaziuns detagliadas da l'uffizi dal register funsil cumpetent. Sco possessur futur d'in bain immobigliar stuessas Vus esser infurmà davart tut las inscripziuns en il register funsil.

Empustar in extract dal register funsil

L'extract dal register funsil survegnis Vus er tar l'uffizi dal register funsil da la vischnanca correspundenta, ils custs dependan da la dimensiun da l'extract.

Chattar l'uffizi dal register funsil

Plan da cataster

Il register funsil cuntegna er ils plans da cataster. Ils plans da cataster vegnan fatgs da la mesiraziun uffiziala e cuntegnan tranter auter ils cunfins dals bains immobigliars ed ils puncts fixs planimetrics ed altimetrics. Las datas èn publicas e pon per part vegnir consultadas en l'internet. Extracts pon vegnir empustads. Per projects da construcziun duvrais Vus extracts cun ina conferma da l'uffizi da mesiraziun.

Empustar in plan da cataster

Quests plans survegnis Vus da l'uffizi da mesiraziun da la vischnanca correspundenta, ils custs dependan dal plan.

Avertura dal bain immobigliar

In bain immobigliar sto esser accessibel ed attatgà als conducts d'electricitad, d'aua e da gas per ch'in project da construcziun possia vegnir realisà. L'avertura è chaussa da la vischnanca. As infurmai tar la vischnanca davart il stadi da l'avertura e davart ils custs d'avertura futurs.