Las autoritads svizras online

directamain tar il cuntegn

Inabel da giuditgar: Tgi represchenta mes interess?

Suenter in accident n’essas Vus betg pli abel da discurrer. Ubain Vus na pudais betg pli guardar da sasez pervia d’ina malsogna. Alura sto in’autra persuna s’occupar da Voss affars e prender decisiuns impurtantas. Cun in mandat preventiv pudais Vus decider tgi che duai esser questa persuna.

Abel da giuditgar è tenor la lescha, tgi che po agir raziunalmain. Ina malsogna u in accident po chaschunar l’inabilitad da giuditgar d’ina persuna. Ella na po lura betg pli reglar sezza ses affars persunals e finanzials. Quai po esser da durada temporara u permanenta.

Ina persuna inabla da giuditgar dovra insatgi che defenda ses interess e che la sustegna. La lescha prevesa per quai la conjugala resp. il conjugal ubain la partenaria registrada resp. il partenari registrà. Els pon reglar ils affars quotidians. Els na pon dentant per exempel betg cumprar u vender immobiglias. Per far quai ston els convocar l’autoritad per la protecziun d'uffants e da creschids (APUC).

Tar persunas che vivan sulettas surpiglia la APUC questas incumbensas dal cumenzament ennà resp. determinescha in procuratur.

La persuna da confidenza pon ins dentant er determinar sez en moda anticipada. Per quai exista l’uschenumnà «mandat preventiv». I po vegnir determinà ina persuna. Ubain i pon vegnir tschernidas pliras persunas per differents affars.

Pretensiuns per il mandat preventiv

Per il mandat preventiv vala il suandant:

  • I existan duas furmas.
  1. Vus pudais scriver, datar e signar il mandat a maun.
  2. Vus pudais elavurar il mandat ensemen cun ina notara u in notar ch’attesta lura il mandat.
  • Vus stuais descriver precisamain las incumbensas che Vus confidais a la persuna. I po sa tractar d’intginas u da tut las incumbensas ch’ina procuratura u in procuratur stuess uschiglio surpigliar.
  • Vus duessas er reglar l’indemnisaziun da la persuna incumbensada. Cas cuntrari fixescha la APUC ina indemnisaziun adequata.
  • Vus pudais midar u revocar il mandat preventiv da tut temp.

En l’internet chattais Vus fegls d’infurmaziun e musters per mandats preventivs.  

Conservaziun

Vus pudais tegnair en salv sez il mandat preventiv. Faschai la segira, ch’el vegnia chattà en cas da basegn.

Vus pudais er inditgar il lieu da deposit a l’uffizi dal stadi civil. Uschia è Voss mandat preventiv da chattar en moda simpla e nuncumplitgada en cas d’urgenza. Quai custa 75 CHF.

En intgins chantuns po il mandat preventiv er vegnir deponì tar in’autoritad. Tut tenor il chantun è quai la APUC, la dretgira da famiglia ubain il notariat d’uffizi.

Cumenzament da l’inabilitad da giuditgar

L’autoritad per la protecziun d'uffants e da creschids cumpetenta conferma ch’ina persuna è daventada inabla da giuditgar. Ella verifitgescha, sch’igl exista in mandat preventiv. Sche quai è il cas, examinescha ella il mandat preventiv:

  • È el valaivel? Èn las formalitads ademplidas ed era l’autura u l’autur abla resp. abel da giuditgar il mument da la redacziun?
  • È la persuna incumbensada adattada sco procuratur? È ella abla da giuditgar? È ella capabla d’exequir questa incumbensa?

La APUC decida davart in’eventuala indemnisaziun, en cas che quella n’è betg reglada en il mandat preventiv.

Cura che questas dumondas èn scleridas, decida la persuna tschernida, sch’ella vul acceptar il mandat preventiv. Sch’ella è pronta da surpigliar questa incumbensa, retschaiva ella l’act da represchentanza da la APUC. Cun quai èn las incumbensas da la APUC tant sco terminadas. Ella intervegna mo pli, sche Voss interess èn periclitads.

Plainpudair

In plainpudair ha effects sumegliants sco il mandat preventiv. Il plainpudair vala dentant en general gia a partir da sia concessiun. Ozendi n’èsi betg pli pussaivel da reglar la represchentanza cun agid d’in plainpudair en cas d’ina inabilitad da giuditgar. Ultra da quai n’èn oravant tut las bancas savens betg pli prontas d’acceptar plainpudairs, sch’il mandant è daventà inabel da giuditgar