La gronda part da las electuras e dals electurs elegia per posta. La Posta surdat il material electoral emplenì al post che dumbra las vuschs. Quai è bunamain adina l'atgna vischnanca. Sche Vus consegnais Voss material electoral a l'urna u al mettais en la chascha da brevs da la vischnanca, sa tschentan quests documents directamain tar la vischnanca.
Ils dumbravuschs
Tut tenor la grondezza da la vischnanca dovri localitads pli grondas, sco ina halla da gimnastica, per dumbrar las vuschs. En las citads dumbran savens plirs tschients u schizunt passa milli persunas las vuschs. Tut tenor la vischnanca sa tracti d'emploiadas ed emploiads, da voluntarias u voluntaris ubain da persunas ch'èn vegnidas selecziunadas ed obligadas casualmain. Mintgatant dumbra ina vischnanca las vuschs er en plirs lieus. I po er esser ch'ina vischnanca vischina pli gronda dumbra las vuschs.
Uschia vegnan zavradas las vuschs
En in emprim pass avran ils dumbravuschs las cuvertas da consegna. Els controlleschan, sche l'attest da votar è suttascrit. (Excepziuns: chantuns Basilea-Citad ed Appenzell Dador, nua ch'ina suttascripziun n'è betg necessaria.) Senza la suttascripziun n'èn las vuschs betg valaivlas. Perquai tramettan ils dumbravuschs mo vinavant las cuvertas electoralas serradas cun ils cedels electorals, sche la suttascripziun è avant maun.
En in segund pass avran els er questas cuvertas. Perquai ch'ils attests da votar èn vegnids separads ordavant da las cuvertas, na po nagin chattar ora, tgi ch'ina persuna ha elegì. Il secret d'elecziun è pia garantì.
La dumbraziun da las vuschs
Alura vegnan dumbradas las vuschs.
Cura che la vischnanca ha dumbrà tut las vuschs, transmetta ella il resultat al biro electoral dal chantun. Il biro electoral chantunal quinta ensemen tut ils resultats da las vischnancas. Suenter èsi cler, tgi ch'è elegì.
La finala communitgescha il biro electoral chantunal ils resultats a la Confederaziun, che publitgescha ils resultats provisorics dal di d'elecziun.
Suenter il di d'elecziun ston ils chantuns u las vischnancas tegnair en salv ils cedels electorals. Els ed ellas pon destruir ils cedels electorals pir, cura che l'Uffizi federal da statistica ha terminà sias lavurs da rectificaziun e cura che nagins recurs u naginas proceduras penalas n'èn pli pendentas.