Duvrai il cedel electoral uffizial che Vus survegnis per posta sco part dal material electoral.
Tscherni Vossa candidata u Voss candidat. Vus pudais suandar las recumandaziuns d'ina partida u d'ina gruppa ubain eleger mintga persuna che ha il dretg d'eleger (inclusiv Svizras e Svizzers a l'exteriur). Ils chantuns UR, AR ed AI n'han betg ina procedura d'annunzia uffiziala per las candidatas ed ils candidats. En il chantun Glaruna è la procedura d'annunzia facultativa. Là chattais Vus las candidatas ed ils candidats sin la pagina d'internet ed en il fegl uffizial dal chantun.
Scrivai a maun sin il cedel electoral il prenum ed il num da famiglia cumplet da la persuna che Vus vulais eleger. Inditgai supplementarmain il lieu da domicil e la professiun u la funcziun da la persuna, sche quai è necessari per l'identifitgar.
Per che Vossa vusch saja valaivla, stuais Vus observar las suandantas reglas:
Duvrai mo il cedel electoral uffizial che Vus survegnis per posta;
scrivai mo in num sin il cedel electoral;
scrivai a maun ed en moda bain legibla;
na faschai nagins commentaris, naginas remartgas e nagins dissegns sin il cedel electoral.
Mettai il cedel electoral emplenì en la cuverta da votar previsa e suttascrivai l'attest da votar (excepziun: Appenzell Dadora). Ulteriur proceder:
Vus pudais eleger per correspundenza. Duvrai per quai la cuverta da resposta previsa.
Vus pudais metter la cuverta da resposta en la chascha da brevs respectiva da Vossa vischnanca. Per regla chattais Vus questa chascha da brevs tar l'administraziun communala.
Il di da l'elecziun pudais Vus er metter persunalmain Vossa cuverta da votar en l'urna.