Duvrai in dals cedels electorals uffizials che Vus survegnis per posta sco part dal material electoral. Sin quest cedel electoral figureschan tut las candidatas uffizialas e tut ils candidats uffizials che candideschan en Voss chantun per in sez en il Cussegl naziunal. Faschai ina crusch en il champ respectiv tar mo ina candidata tschernida u tar mo in candidat tschernì.
Per che Vossa Vusch saja valaivla, stuais Vus observar las suandantas reglas:
Duvrai mo il cedel electoral uffizial che Vus survegnis per posta.
Faschai a maun ina crusch tar il num da Vossa candidata u da Voss candidat.
Na faschai nagins commentaris, naginas remartgas e nagins dissegns sin il cedel electoral.
Mettai il cedel electoral en la cuverta da votar previsa (NW) u en il caum previs da la cuverta (OW) e suttascrivai l'attest da votar. Ulteriur proceder:
Vus pudais eleger per correspundenza. Duvrai per quai la cuverta da resposta previsa.
Vus pudais bittar la cuverta da resposta en la chascha da brevs respectiva da Vossa vischnanca. Per regla chattais Vus questa chascha da brevs tar l'administraziun communala.
Il di da l'elecziun pudais Vus er metter persunalmain Vossa cuverta da votar en l'urna.