directamain tar il cuntegn

Organisaziun da las elecziuns dal Cussegl dals chantuns: Modalitads, reglas ed etappas impurtantas

Il Cussegl dals chantuns sa cumpona da 46 commembers. Lur elecziun è reglada sin plaun chantunal. Numerus acturs (autoritads, partidas, candidatas e candidats) èn involvids en l’elecziun dal Cussegl dals chantuns.

Mintga chantun definescha sez las reglas, tenor las qualas sias cusseglieras e ses cussegliers vegnan elegids en il Cussegl dals chantuns. Bler è quasi il medem en tut ils chantuns, ma tipic svizzer èn dentant er particularitads chantunalas. En tut ils chantuns vegnan las represchentantas ed ils represchentants elegids directamain dal pievel.

Quantas candidatas e quants candidats vegnan elegids en tge chantun?

Quants sezs ha mintga chantun en il parlament?

Cura ha lieu l’elecziun dal Cussegl dals chantuns?

L'emprim scrutini ha lieu en tut ils chantuns il medem di sco las elecziuns dal Cussegl naziunal. La suletta excepziun è il chantun Appenzell Dadens. Là elegia il cumin la cussegliera ubain il cusseglier dal Cussegl dals chantuns gia l’ultima dumengia d’avrigl.

Sistem electoral

En la plipart dals chantuns vala la procedura da maiorz: Elegida è quella persuna che survegn las bleras vuschs. Tar las particularitads chantunalas tutgan regulaziuns differentas davart la dumonda, cur ch'ina persuna è elegida (maioritad absoluta, maioritad relativa), davart l'andament da las elecziuns e davart la dumonda, tgi che dastga votar.

AI - Landsgemeinde

Candidatas e candidats, partidas e selecziun da las persunas

Las partidas proponan lur candidatas e candidats. Per regla pon dentant vegnir elegidas er autras persunas che las persunas proponidas da las partidas. Elegida è – en praticamain tut ils chantuns – quella persuna che survegn las bleras vuschs, premess ch'il dumber da vuschs cuntanschia in tschert minimum (per il solit la maioritad absoluta). Sche betg anc tut las represchentantas e tut ils represchentants n'èn elegids suenter l'emprim scrutini, ha lieu in segund scrutini. Ils chantuns determineschan per il solit gia avant l’elecziun cur ch’i vegn manà tras in eventual segund scrutini.

Tgi po candidar per l’elecziun dal Cussegl dals chantuns?

Tut è pront per las elecziuns dal Cussegl dals chantuns

Paucas emnas avant il termin d'elecziun: Entant che las candidatas ed ils candidats emprovan anc da gudagnar uschè bleras vuschs sco pussaivel, tramettan ils chantuns il material electoral a las votantas ed als votants. Las vischnancas engaschan gidantras e gidanters per las elecziuns, endrizzan ils locals electorals e preparan las urnas. Er las persunas cun dretg da votar entran en acziun. Ellas possedan ussa tut ils documents, tut las infurmaziuns e tut las instrucziuns ch'i dovra per decider, tgi che las duai represchentar ils proxims quatter onns en il Cussegl dals chantuns.

Las elecziuns dal Cussegl dals chantuns

La fin d’emna da votaziun elegia il pievel las cusseglieras ed ils cussegliers dal Cussegl dals chantuns. Cur ch'ils locals electorals serran lur portas la dumengia d'elecziun, vegni serius per las candidatas ed ils candidats. Bainbaud vegni ad esser cler tgi ch'è elegì en il Cussegl dals chantuns, tgi che n’è betg elegì e tgi che sto far part dal segund scrutini. Las vischnancas communitgeschan ils resultats als chantuns che infurmeschan las victuras ed ils victurs e che s'occupan alura da la controlla uffiziala dals resultats d'elecziun.