directamain tar il cuntegn

Infurmaziuns davart la pagina d’internet e davart la collavuraziun

Bainvegni sin www.ch.ch/elecziuns2019, la pagina uffiziala d’internet da l’administraziun federala davart las elecziuns federalas 2019.

Il portal www.ch/ch/Elecziuns2019 è ina collavuraziun tranter la Chanzlia federala, l’Uffizi federal da statistica e ch.ch. El porscha infurmaziuns davart las elecziuns da las duas chombras dal Parlament svizzer (Cussegl naziunal e Cussegl dals chantuns) e gida ad encleger meglier la procedura electorala. Il portal na sa drizza betg mo ad observadras ed observaders da la politica svizra, mabain er ed en emprima lingia a tut las burgaisas ed a tut ils burgais.

Dal signal da partenza da l’onn electoral fin a la publicaziun dals resultats – quest portal è concepì sco plattafurma infurmativa che sa sviluppa cuntinuadamain. Las fasas principalas èn las suandantas: L’emprima part cuntegna infurmaziuns davart l’organisaziun da las elecziuns e davart las premissas per ina candidatura per il Cussegl naziunal e per il Cussegl dals chantuns tenor chantuns. Alura vegnan publitgadas sin il portal intginas explicaziuns praticas che gidan ad eleger ils commembers da las duas chombras en moda correcta; per questas explicaziuns è stada fundamentala la collavuraziun directa cun ils 26 chantuns. La finala, suenter che las urnas èn serradas, vegn il portal a publitgar ils resultats electorals per omaduas chombras sco er numerusas statisticas ed analisas da las elecziuns.

In “quiz electoral” permetta a las burgaisas ed als burgais da suttametter lur savida davart las elecziuns dal parlament ad in test, ed ina rubrica FAQ, che vegn dal rest actualisada cuntinuadamain, als gida a sclerir eventuals dubis ed intschertezzas areguard quest tema.
Per las Svizras ed ils Svizzers a l’exteriur che vulan candidar u eleger porscha il portal plinavant infurmaziuns specificas, quai tranter auter grazia a la collavuraziun cun il Departament federal d’affars exteriurs.