directamain tar il cuntegn

Colliaziuns da glistas e sutcolliaziuns da glistas

En tscherts cas pon las partidas u las gruppaziuns che candideschan decider da far ina colliaziun da glistas per augmentar las schanzas da vegnir elegidas.

En ils chantuns che fan l’elecziun tenor il sistem da proporz pon las partidas politicas decider da colliar lur glistas per augmentar las schanzas da gudagnar sezs. Questa pussaivladad numn’ins ina colliaziun da glistas.

A l’intern d’ina colliaziun da glistas pon vegnir colliadas duas u dapli glistas furmond ina sutcolliaziun da glistas. Quai funcziuna dentant mo, sche las glistas han la medema denominaziun e sa differenzieschan unicamain tras in’agiunta per specifitgar la vegliadetgna, la regiun, l’appartegnientscha ad ina gruppaziun u la schlattaina da la persuna che candidescha.

Dus exempels:

  • Colliaziun tranter la partida “A”, la partida “A Dunnas”, la partida “A Giuvna”, la partida “B” e la partida “B giuvna” = colliaziun da glistas; 
  • A l’intern da questa colliaziun da glistas è pussaivla ina sutcolliaziun da glistas. En quel cas po la partida “A” entrar en ina sutcolliaziun da glistas mo cun la partida “A Giuvna” e la partida “A Dunnas”, dentant betg cun la partida “B” ubain “B Giuvna”.
Tut las colliaziuns da glistas e sutcolliaziuns da glistas ston vegnir inoltradas fin al termin da rectificaziun ch’il chantun ha fixà (14 u 7 dis suenter il termin final per inoltrar las glistas da candidatas e candidats, art. 29 al. 4 LDP). Ina giada che las colliaziuns da glistas èn vegnidas rectifitgadas, na pon ellas betg pli vegnirrevocadas.

L’Ordinaziun davart il dretgs politics (ODP) cuntegna in formular exemplaric per decleraziuns davart las colliaziuns da glistas (agiunta 3b).
Co candidesch jau per il Cussegl naziunal?
Ulteriuras infurmaziuns davart las propostas electoralas: Lescha federala davart ils dretgs politics, art. 16-57

Tge intent han colliaziuns e sutcolliaziuns da glistas?

Tras colliaziuns e sutcolliaziuns da glistas han las partidas u las gruppaziuns che candideschan dapli schanzas da gudagnar sezs en il Cussegl naziunal. Tut las vuschs che van a las glistas colliadas vegnan quintadas ensemen, sco sch'i fiss in'unica glista.


Ultima midada : november 2019