Las autoritads svizras online

directamain tar il cuntegn

Disposiziun dal pazient – tge che Vus stuais savair

Cun ina disposiziun dal pazient garantis Vus che Vossa voluntad areguard las mesiras medicinalas vegn renconuschida er, sche Vus na savais betg pli As exprimer sez u sche Vus n'essas betg pli abel da giuditgar. Quai po esser il cas suenter in accident u en consequenza d'ina malsogna.

Ina disposiziun dal pazient regla il tractament medicinal durant il stadi final d'ina malsogna u suenter in grev accident. Ins distingua tranter:

  • disposiziuns dal pazient da standard concisas e
  • disposiziuns dal pazient orientadas a las mesiras, las qualas sa drizzan a persunas che han gia malsognas.

Ina disposiziun dal pazient na po betg vegnir fatga d'ina terza persuna.

Exprimi Voss giavischs e deponi la disposiziun dal pazient emplenida, datada e suttascritta tar Voss medi da famiglia u tar Voss struschs confamigliars. Sco alternativa pudais Vus metter la disposiziun dal pazient sin ina plattafurma online e communitgar a Voss medi ed a Voss confamigliars il lieu, nua ch'ella vegn tegnida en salv. Purtai en Vossa bursa in renviament a Vossa disposiziun dal pazient ed al lieu, nua ch'ella vegn tegnida en salv. Il lieu dal deposit po er vegnir inscrit sin la carta d'assicuranza.

I sto vegnir controllà regularmain, sche la disposiziun dal pazient è anc correcta, autramain sto ella vegnir curregida e sia correctadad sto vegnir confermada cun la data e cun Vossa suttascripziun.

Ina tscherna da disposiziuns dal pazient per chargiar sin l'agen computer chattais Vus qua:

Schelta da las disposiziuns dal pazient