directamain tar il cuntegn

Betg a chasa e tuttina votar

Vus n'essas betg a chasa, mabain en viadi da fatschenta, en vacanzas u a l'ospital, e vulais tuttina votar. Per il solit pudais Vus far quai.

En cas d'ina absenza pli curta

En cas d'ina absenza da main che 3 emnas pon ins tuttina votar senza problems. Quai, perquai ch'il material da votar vegn tramess 4 u il pli tard 3 emnas avant la votaziun directamain en Vossa chascha da brevs. Uschia pudais Vus ubain votar per correspundenza anc avant Vossa absenza – ubain curt avant la votaziun, cur che Vus essas puspè a chasa. Sche Vus essas preschenta u preschent la fin d'emna da votaziun, pudais Vus natiralmain er votar directamain a l'urna en il local da votaziun da Vossa vischnanca.

En cas d'ina absenza pli lunga

En cas d'absenzas pli lungas pudais Vus far la dumonda da survegnir il material da votar in pau pli baud. As infurmai per plaschair tar Vossa vischnanca davart ils detagls.

Persunas pertutgadas han anc in'ulteriura pussaivladad: Vus pudais laschar sviar Vossa posta ed uschia er il material da votar. La Posta porscha quest servetsch cunter ina taxa. En cas da dimoras a l'exteriur pon la spediziun dal material da votar e la respediziun da la cuverta da votar tras la Posta durar in tschert temp. Quai stoi vegnir resguardà per evitar che la vusch arrivia memia tard tar la vischnanca cumpetenta.

La Posta - Sviar la posta

Sviar il material da votar a l'ospital

En tscherts chantuns pudais Vus er laschar trametter il material directamain a l'ospital, sche Vus stuais star là pli ditg. As infurmai tar Vossa vischnanca u tar Voss chantun.