directamain tar il cuntegn

Cura e nua votar ed eleger?

Las persunas cun dretg da votar pon votar ed eleger per correspundenza u dar giu lur vusch directamain a l'urna. Intgins chantuns porschan a las burgaisas ed als burgais ultra da quai la pussaivladad da dar giu la vusch sin via electronica (e-voting). Las suandantas infurmaziuns valan er per las elecziuns dal Cussegl naziunal e dal Cussegl dals chantuns dals 20 d'october 2019.

Il pli baud 4 emnas ed il pli tard 3 emnas avant ina votaziun u in'elecziun federala As vegn tramess il material correspundent. Responsabla per la spediziun è la vischnanca, en la quala Vus avais il dretg da votar.

Material da votar
Material electoral per il Cussegl naziunal e per il Cussegl dals chantuns

Nua pon ins votar ed eleger?

Ins ha trais pussaivladads:

  • Dar giu la vusch en il local da votaziun da Vossa vischnanca da domicil
    Vus pudais dar giu Vossa vusch directamain a l'urna. Prendai cun Vus in document d'identitad (carta d'identitad u passaport) sco er il material da votar u material electoral. Observai exactamain l'instrucziun agiuntada. 
    Attenziun:
    - Scleri nua ch'il local da votaziun da Vossa vischnanca sa chatta sco er durant tge dis ed uras ch'el è avert. Questas infurmaziuns chattais Vus normalmain sin la cuverta che cuntegna il material da votar. As drizzai en cas d'intschertezzas directamain a Vossa vischnanca.
    - Sche Svizras e Svizzers a l'exteriur vegnan en Svizra per in'elecziun u ina votaziun e vulan ir a prender il material da votar directamain tar la vischnanca da votaziun, ston els infurmar la vischnanca almain 6 emnas avant il termin da votaziun, per ch'il material na vegnia betg tramess a l'exteriur.
  • Votaziun per correspundenza
    Vus pudais votar per correspundenza. Per quest intent emplenis Vus il cedel da votar ed al tramettais per posta a Vossa vischnanca da votaziun. Duvrai il material da votar u il material electoral e suandai l'instrucziun che Vus avais survegnì da Vossa vischnanca ensemen cun quest material. Er las Svizras ed ils Svizzers a l'exteriur pon votar u eleger per correspundenza. Quai funcziuna da medema maniera sco la votaziun per correspundenza en Svizra.
    Attenziun:
    - Vus pudais votar u eleger per correspundenza, uschespert che Vus avais survegnì Voss material da votar u Voss material electoral.
    - Observai ils termins da consegna da la posta.
    - Tut tenor il chantun u la vischnanca stuais Vus francar sez la cuverta da resposta.
    - Differentas vischnancas plazzeschan supplementarmain ina chascha da brevs per consegnar la cuverta gia avant la dumengia da votaziun u d'elecziun, senza stuair francar la cuverta. Verifitgai però, fin cura ch'igl è maximalmain pussaivel da bittar en Vossa cuverta.

  • Votaziun electronica (e-voting)
    Differents chantuns porschan ad ina part da las burgaisas e dals burgais cun dretg da votar la pussaivladad da votar sin via electronica. Per las votaziuns e per las elecziuns valan autras cundiziuns.
    Attenziun:
    E-voting: Infurmaziuns tenor chantun e contacts en las singulas vischnancas

Il chanal da votaziun electronic

Votaziuns ed elecziuns: infurmaziuns da las vischnancas