directamain tar il cuntegn

Maioritad dal pievel e dals chantuns

In project vegn acceptà, sch’i dat dapli vuschs affirmativas che negativas. Tar midadas constituziunalas dovri ultra da quai la maioritad dals chantuns. In cas spezial è l’iniziativa cun cuntraproposta directa.

Cura basta la maioritad dal pievel?

Sch’i va per in referendum facultativ (p.ex. ina midada da lescha), vegn il project acceptà, sche dapli vuschs din (scrivan) “gea” enstagl da “na” sin il cedel da votar.

Cura dovri la maioritad dal pievel e la maioritad dals chantuns?

Sch’i sa tracta d’in referendum obligatoric (p.ex. ina midada constituziunala) giogan er ils chantuns ina rolla. Il project è acceptà, sche pli bleras votantas e pli blers votants voteschan “gea” enstagl da “na” ed plinavant, sch’ina maioritad dals chantuns accepta il project da votaziun (maioritad dals chantuns).

Concernent la maioritad dals chantuns vegnan resguardas ils resultats da votaziun dals singuls chantuns. Sch’ina maioritad dal pievel d’in chantun ha ditg “gea”, è er la vusch dal chantun in “gea”. La maioritad dals chantuns vul dir, sch’ina maioritad dals chantuns vegn cuntanschida.

Attenziun percunter: Cun eruir la maioritad dals chantuns quintan las vuschs dals anteriurs mez chantuns Sursilvania, Sutsilvania, Basilea-Citad, Basilea-Champagna, Appenzell Dadens, Appenzell Dadora be mintgamai ina mezza vusch.

Iniziativa u cuntraproposta directa?

Sche la maioritad dals votants e dals chantuns acceptan a medem temp ina iniziativa ed ina cuntraproposta, vegn effectuada in regla particulara. La dumonda decisiva è centrala. Tar quella inditgeschan ils votants, sch’els prefereschan l’iniziativa u la cuntraproposta. En vigur va quel project che ha cuntanschì en la dumonda decisiva ina maioritad tar ils votants e tar ils chantuns (maioritad dals chantuns).

Tge è ina iniziativa federala dal pievel?
Tge è ina cuntraproposta directa? Tge è ina cuntraproposta indirecta?

Laschar vid la dumonda decisiva?

Tgi che na respunda betg la dumonda decisiva, votescha per uschè dir vid areguard quella dumonda. Ella u el surlascha uschia la decisiun a las ulteriuras votantas e votants. Sia ulteriura vusch areguard l’iniziativa u la cuntraproposta directa resta dentant valaivla.

Laschar vid il cedel da votar

Nagina participaziun minimala

In resultat da votaziun è er lura valaivel, sche la participaziun è pitschna. I na sto betg vegnir cuntanschì in quorum, pia ina participaziun minimala.