directamain tar il cuntegn

Agids da votaziun e d'elecziun per persunas attempadas, per persunas cun impediments e per persunas malsaunas

Er burgaisas e burgais malsauns u cun impediments che na pon betg emplenir sezs il cedel da votaziun u il cedel electoral, duain pudair exequir lur dretgs politics. Ils chantuns gidan ch'ellas ed els survegnan l'agid necessari en las vischnancas.

Urnas ambulantas

Per persunas attempadas poi esser stentus dad ir al local da votaziun u al local electoral. Perquai han differents chantuns realisà in sistem d'urnas ambulantas.

En las vischnancas da differents chantuns circuleschan pia urnas tenor in urari fixà. In ulteriur agid èn la urnas ambulantas en ospitals e chasas da persunas attempadas. En tscherts chantuns vegn ina delegaziun dal local da votaziun ed electoral sin dumonda a chasa per ils cedels da votar ed electorals da las persunas malsaunas, attempadas u cun impediments.

Sche Vus vulais savair dapli da questas proceduras spezialas, As drizzai per plaschair a Vossa vischnanca.

Votaziun tras substituziun

Per che umans, che na pon betg ir al local da votaziun u al local electoral, possian tuttina votar, permettan tscherts chantuns la votaziun tras substituziun.

Persunas che na san betg scriver, dastgan laschar emplenir il cedel da votar d'ina terza persuna. Questa terza persuna dastga er metter il cedel da votar en la cuverta da votar e purtar quella a l'urna respectivamain la trametter.  
La votaziun tras substituziun è permessa per las votaziuns ed elecziuns federalas, sch'il chantun respectiv permetta quai er per las votaziuns ed elecziuns chantunalas.

Sche Vus vulais savair dapli da questas proceduras spezialas, As drizzai per plaschair a Vossa vischnanca.