directamain tar il cuntegn

Regenza chantunala: Rolla e cumposiziun

Uschia sco sin plaun federal vegnan exequidas er sin plaun chantunal las trais pussanzas – legislativa, executiva, giudicativa – da trais differentas autoritads. La pussanza executiva ha la regenza chantunala.

Cumposiziun da las regenzas chantunalas

Las regenzas chantunalas sa cumponan tut tenor chantun da 5 fin 7 commembras e commembers.

Departaments chantunals

Per regla maina mintga commembra u commember da la regenza in departament (per exempel il departament da finanzas, il departament da sanadad, il departament d'educaziun e.u.v.) gist tuttina sco sin plaun federal.

Faschai stim da la designaziun

Tut tenor chantun ha la regenza er num Cussegl guvernativ, Cussegl da stadi u Cumissiun dal chantun.

Las incumbensas las pli impurtantas

La regenza chantunala maina en emprima lingia las fatschentas dal chantun. Ultra da quai planisescha e realisescha ella projects ed activitads. Ella accorda ses agir cun quel da la Confederaziun e da las vischnancas.

La regenza chantunala exequescha las leschas e las disposiziuns da la Confederaziun sco er quellas dal chantun. Ella maina e coordinescha ultra da quai l'administraziun chantunala en il rom da las cumpetenzas che la Constituziun federala la conceda.

La regenza chantunala ha er l'incumbensa impurtanta da preparar il plan da finanzas dal chantun e da gestir las finanzas dal chantun.

Particularmain represchenta la regenza chantunala il chantun vers anora.

Sesidas regularas, conclus colleghials

Per liquidar las fatschentas da la regenza salvan las commembras ed ils commembers regularmain sesidas, e quai tenor in chalender predefinì. Questas sesidas han lieu per regla davos portas serradas. Tut ils conclus che pertutgan la guvernanza statala vegnan prendids en il collegi. Mintga commembra e commember da la regenza è pia dumandà da defender quella opiniun ch'è sa fatga valair en il collegi, e quai independentamain da sia opiniun persunala.

Presidenta u president da la regenza chantunala

La presidenta u il president da la regenza mida per regla ina giada per onn u, tut tenor chantun, en in ritmus da dus onns tenor il princip d'anzianitad (dumber d'onns en la regenza). Quest uffizi n'è collià cun nagins auters privilegis e cun nagin auter status particular, auter che la direcziun da las sesidas da la regenza.

Las commembras ed ils commembers da la regenza da Voss chantun

Karte der Schweizer Kantone