directamain tar il cuntegn

Parlament chantunal: Rolla e cumposiziun

Uschia sco sin plaun federal vegnan exequidas er sin plaun chantunal las trais pussanzas – legislativa, executiva, giudicativa – da trais differentas autoritads. La pussanza legislativa ha il parlament chantunal.

Cumposiziun dal parlament chantunal

Il dumber da commembras e commembers dals singuls parlaments chantunals variescha. En la gronda part dals cas dependa el dal dumber d'abitantas e d'abitants. Actualmain sa chatta el tranter 50 commembras e commembers en il chantun Appenzell Dadens e 180 en il chantun Turitg.

Sco il parlament federal èn tut ils parlaments chantunals parlaments da milissa. Quai vul dir ch'ils commembers pon pratitgar sper lur activitad parlamentara anc in'autra activitad da gudogn.

Faschai attenziun a la designaziun

Tut tenor il chantun sa numna il parlament chantunal Cussegl grond, “Grosser Rat”, “Gran Consiglio”, “Landrat” u “Kantonsrat”. Tut ils parlaments chantunals han però la medema pussanza legislativa.

Las incumbensas las pli impurtantas

In parlament chantunal ha en emprima lingia l'incumbensa da decider (acceptar, refusar u midar) davart las leschas chantunalas e da prender posiziun tar iniziativas e petiziuns che vegnan inoltradas da burgaisas e burgais, da vischnancas u d'in u da plirs deputads.

Ultra da quai decida il parlament chantunal davart il preventiv che la regenza chantunala preschenta ed approvescha l'incassament da taxas e taglias.

La finala surveglia il parlament l'activitad da la regenza.

Tge è ina lescha?

Co fan ins ina lescha?

Sesidas publicas regularas

Ils deputads sa scuntran regularmain – circa ina giada il mais – tenor in chalender fix. Questas sesidas èn – tant sco ils protocols da quellas – per regla publicas.

Els sa radunan plinavant en cumissiuns ad hoc (per exempel cumissiun da traffic, cumissiun d'economia), analiseschan dumondas specificas e preparan fatschentas che vegnan alura tractadas en il parlament (plenum) u suttamessas a la regenza.

President dal parlament

Mintga onn vegn in commember dal parlament elegì sco president. La persuna pertutgada ha en spezial l'incumbensa da manar las sesidas dal parlament.

Commembers dal parlament da Voss chantun

Karte der Schweizer Kantone