directamain tar il cuntegn

Tge è e-voting?

E-voting en Svizra vul dir votar sur l'internet. Duvrada vegn er la noziun dal chanal electronic da votaziun.

Dal proxim sgol en vacanzas sur la cumpra da victualias fin a l'annunzia per ina plazza: nus pudain far adina dapli sur l'internet. La votaziun electronica cuntinuescha cun quest svilup en il sectur da la politica.

E-voting vul dir che las votantas ed ils votants pon votar ed eleger sur l'internet. Quai pussibilitescha da consegnar sia vusch independentamain dal lieu e dal temp.

E-voting: stadi actual

Fin il cumenzament da l’onn 2019 purschevan diesch chantuns la votaziun electronica. Ils chantuns avevan alura la tscherna tranter dus sistems da votaziun electronica: il sistem dal chantun Genevra ed il sistem da la Posta Svizra. A basa da sia decisiun dal november 2018 ha il chantun Genevra communitgà il zercladur 2019 che ses sistem na stettia betg pli a disposiziun. La Posta ha fatg da savair ils 5 da fanadur 2019 ch’il sistem verifitgabel individualmain na vegnia betg pli offert als chantuns. Il sistem cumplettamain verifitgabel da la Posta duai esser pront per il diever a partir da l’onn 2020.

Damai ch’i na stat actualmain a disposiziun nagin sistem da votaziun electronica en Svizra n’esi betg pussaivel da votar sin via electronica en noss pajais (stadi: fanadur 2019).

A chaschun da sia sesida dals 26 da zercladur 2019 ha il Cussegl federal incumbensà la Chanzlia federala da concepir en collavuraziun cun ils chantuns ina restructuraziun da la fasa d’emprova e d’al preschentar in rapport en chaussa fin la fin da l’onn 2020.

Chanzlia federala - Cronica da l'introducziun dal e-voting en Svizra

E-voting en auters stadis

Projects dad e-voting datti mo en paucs stadis. Per gronda part sa tracti qua da la votaziun sin via electronica en locals da votaziun.