directamain tar il cuntegn

Co votesch jau en moda electronica?

Tgi che dastga votar ed eleger en moda electronica, survegn las infurmaziuns necessarias per quai sin ses attest da votar. La persuna che votescha po er controllar, sche sias indicaziuns èn vegnidas registradas correctamain.

Per eleger e votar en moda electronica dovri, sco tar blers auters servetschs en l'internet, plirs codes. Quests codes survegnis Vus sin Voss certificat dal dretg da votar (u – tut tenor il chantun – sin l'attest da votar), sche Vus avais il dretg da votar e d'eleger en moda electronica. Cun in emprim code survegnis Vus access al sistem d'elecziun u da votaziun en l'internet. Là pudais Vus inserir Vossa decisiun sin in formular che sumeglia il cedel da votar respectivamain il cedel electoral.

Tgi po votar a moda electronica?

Controllar la consegna da la vusch

Suenter che Vus avais votà, pudais Vus controllar la consegna da Vossa vusch. Plirs codes As permettan da controllar, sche Vossa vusch è vegnida consegnada en moda correcta al sistem. Spezialistas e spezialists discurran da la verificabilitad individuala. 

Stadi actual

Fin il cumenzament da l’onn 2019 purschevan diesch chantuns la votaziun electronica. Ils chantuns avevan alura la tscherna tranter dus sistems da votaziun electronica: il sistem dal chantun Genevra ed il sistem da la Posta Svizra. A basa da sia decisiun dal november 2018 ha il chantun Genevra communitgà il zercladur 2019 che ses sistem na stettia betg pli a disposiziun. La Posta ha fatg da savair ils 5 da fanadur 2019 ch’il sistem verifitgabel individualmain na vegnia betg pli offert als chantuns. Il sistem cumplettamain verifitgabel da la Posta duai esser pront per il diever a partir da l’onn 2020.

Damai ch’i na stat actualmain a disposiziun nagin sistem da votaziun electronica en Svizra n’esi betg pussaivel da votar sin via electronica en noss pajais (stadi: fanadur 2019).

A chaschun da sia sesida dals 26 da zercladur 2019 ha il Cussegl federal incumbensà la Chanzlia federala da concepir en collavuraziun cun ils chantuns ina restructuraziun da la fasa d’emprova e d’al preschentar in rapport en chaussa fin la fin da l’onn 2020.

Infurmaziuns da la Chanzlia federala

Infurmaziuns da la Chanzlia federala