directamain tar il cuntegn

Tge è ina iniziativa federala dal pievel?

L'iniziativa federala dal pievel è in instrument politic che pussibilitescha a las burgaisas ed als burgais da midar la Constituziun federala.

La Constituziun federala po vegnir midada cun ina iniziativa dal pievel.

Ina iniziativa po avair la furma d'ina proposta generala u d'in sboz elavurà.

Per ch'ina iniziativa dal pievel reusseschia, ston las iniziantas ed ils iniziants rimnar entaifer 18 mais 100 000 suttascripziuns da persunas che han il dretg da votar. Tgi che suttascriva, va d'accord cun l'intent da l'iniziativa.

Da questas duas pussaivladads vegn duvrà en la pli gronda part dals cas il sboz elavurà.

Il parlament controlla, sche l'unitad da la furma e l'unitad da la materia èn resguardadas e sche las disposiziuns dal dretg internaziunal stringent vegnan observadas. Sche questas premissas n'èn betg ademplidas, po il parlament declerar l'iniziativa cumplainamain u parzialmain sco nunvalaivla.

Sche l'Assamblea federala declera l'iniziativa sco valaivla, vegn ella suttamessa al pievel per la votaziun. Il Cussegl federal ed il parlament la pon confruntar cun ina cuntraproposta directa u cun ina cuntraproposta indirecta.

Tge è ina cuntraproposta directa? Tge è ina cuntraproposta indirecta?
Co po ina iniziativa federala dal pievel vegnir lantschada? Tgi dastga lantschar ina iniziativa federala dal pievel?

L'iniziativa vegn suttamessa al pievel ed als chantuns per la votaziun, nun che las iniziantas ed ils iniziants retirian l'iniziativa.

L'iniziativa è acceptada, sch'ella vegn approvada da la maioritad dal pievel e da la maioritad dals chantuns (maioritad dubla).

Il parlament svizzer – glossari dal parlament – iniziativa dal pievel

Nagina iniziativa legislativa sin plaun federal

Sin plaun federal po vegnir pretendida cun ina iniziativa dal pievel la revisiun totala u parziala da la Constituziun federala, però betg la revisiun d'ina lescha federala existenta u l'introducziun d'ina nova lescha. En differents chantuns èsi dentant pussaivel da pretender cun ina iniziativa dal pievel la midada d'ina lescha chantunala. Quest gener d'iniziativa vegn numnà iniziativa legislativa.

Iniziativas chantunalas e communalas dal pievel