directamain tar il cuntegn

Co lantschar ina iniziativa federala dal pievel?

Per pudair lantschar ina iniziativa federala dal pievel ston esser ademplidas tschertas premissas e sto vegnir observada la procedura. Procedura e premissas.

Tgi po lantschar ina iniziativa dal pievel?

Mintga persuna che ha il dretg da votar en Svizra po lantschar ina iniziativa dal pievel. Quai vala er per las Svizras ed ils Svizzers a l'exteriur.

Avant che lantschar ina iniziativa dal pievel contactai per plaschair la Chanzlia federala. Ella furnescha tut las infurmaziuns davart la procedura.

Chanzlia federala
Chasa federala vest
3003 Berna
Tel. +41 58 462 21 11
info@bk.admin.ch

Chanzlia federala – Iniziativas dal pievel

Tge ston ins far, sch'ins vul lantschar ina iniziativa dal pievel?

  • Il comité d'iniziativa sto contactar la Chanzlia federala e l'infurmar davart il project. La Chanzlia federala infurmescha il comité davart tut ils detagls da la procedura.
  • Ins sto fundar in comité d'iniziativa che consista d'almain 7 e da maximalmain 27 persunas che han il dretg da votar sin plaun federal.
  • Il comité sto scriver il text da l'iniziativa en ina lingua uffiziala e sto dar in titel al text.
  • Il text ed il titel vegnan suttamess a la Chanzlia federala. Quella translatescha il text ed il titel en las autras linguas uffizialas.
  • Il comité preschenta a la Chanzlia federala in model d'ina glista da suttascripziun.
  • La Chanzlia federala controlla, sche las glistas da suttascripziun adempleschan las pretensiuns giuridicas.
  • Il conclus da la Chanzlia federala vegn publitgà en il Fegl uffizial federal. A partir da quest mument ha il comité 18 mais temp per rimnar 100 000 suttascripziuns, da laschar examinar quellas da las vischnancas (vesair qua sutvart) e d'inoltrar ellas a la Chanzlia federala. Tenor las experientschas n'èn betg tut las suttascripziuns valaivlas. Perquai vegni recumandà da rimnar passa 100 000 suttascripziuns. La controlla tras las vischnancas po durar in tschert temp. Perquai vegni cusseglià da pensar a temp a quest fatg e d'inoltrar regularmain las suttascripziuns, per ch'il termin da 18 mais possia vegnir resguardà.
  • Ina iniziativa dal pievel reussescha, sche la Chanzlia federala conferma ch'i sajan vegnidas consegnadas almain 100 000 suttascripziuns valaivlas. La votaziun dal pievel n'ha dentant betg lieu gist suenter: Perquai ch'il Cussegl federal ed il parlament ston tractar l'iniziativa, poi durar plirs onns davent da l'inoltraziun fin a l'organisaziun da la votaziun.
Tgi dastga suttascriver ina iniziativa dal pievel e co vegnan controlladas las suttascripziuns?

Inoltraziun da las glistas da suttascripziun

Sche Vus vulais savair, nua e co che Vus stuais inoltrar las glistas da suttascripziun a la Chanzlia federala a Berna, cliccai sin il suandant link:

Chanzlia federala - Iniziativas dal pievel

Glista: muster (en tudestg)