Las autoritads svizras online

directamain tar il cuntegn

Glista da controlla per la cumpra d'ina chasa u d'ina abitaziun

Vus essas anc intschert, sche Vus vulais cumprar in'abitaziun u ina chasa? La glista da controlla qua sutvart As gida a prender ina decisiun.

Prender en locaziun u cumprar?

Fin a tge pretsch èsi pli favuraivel da cumprar che da prender en locaziun ina chasa u in'abitaziun? Calculai cun il calculader dals custs da l'Associaziun svizra dals proprietaris da chasas (APC) il pretsch da cumpra maximal per in'atgna chasa u atgna abitaziun, tar la quala ils custs d'abitar per mais n'èn betg pli auts che Voss custs da locaziun actuals, sco er l'entrada ch'è necessaria per cumprar questa chasa u questa abitaziun.

Tge sto la proprietad d'abitar ademplir?

Tge basegns avais Vus areguard ina chasa u in'abitaziun? La glista da controlla da hausinfo.ch As gida da pensar vi da tut quai ch'è impurtant.

Particularitads concernent la cumpra d'ina chasa u d'ina abitaziun

  • Vus n'avais nagina ristga da desditga.
  • En il rom da las reglas legalas vertentas (urden da construcziun vertent da la vischnanca/dal chantun u da la proprietad en condomini) pudais Vus midar la chasa u l'abitaziun en l'edifizi sco che Vus vulais.
  • Voss dabun da spargn duvrà è lià a la chasa u a l'abitaziun.

Furmas da proprietad

Tut tenor il stadi civil vegnan en dumonda differentas furmas da proprietad. Infurmaziuns en chaussa chattais Vus sin la pagina correspundenta da ch.ch.

Cumprar ina chasa u in'abitaziun en Svizra sco persuna estra

Sche Vus sco persuna estra vulessas acquistar spazi d'abitar u in bain immobigliar en Svizra, duvrais Vus eventualmain ina permissiun. Ulteriuras infurmaziuns en chaussa chattais Vus sin la pagina correspundenta da ch.ch.

Suttametter la proprietad d'abitar a la taglia

  • Tgi che abita en sia atgna chasa u en sia atgna abitaziun, sto suttametter a la taglia sco entrada l'uschenumnada valur da l'atgna locaziun. Da l'autra vart èn deducibels cumplainamain ils tschains ipotecars e per part las expensas per il mantegniment.
  • En blers chantuns pajais Vus ina taglia sin immobiglias (er numnada taglia funsila u taglia sin bains immobigliars). 
  • Taglia sin midada da maun: per regla vegn ella incassada tar la cumpra d'in bain immobigliar.
  • Tgi che posseda in'abitaziun, ina chasa u in bain immobigliar, sto inditgar quai en la decleraziun da taglia e paja per quai ina taglia sin la facultad per immobiglias.
  • En cas d'ina vendita sto eventualmain vegnir pajada ina taglia sin il gudogn tras la vendita da bains immobigliars.

Ulteriuras infurmaziuns davart la taxaziun d'immobiglias chattais Vus sin las paginas correspundentas da ch.ch.

Construir sez

Sche Vus vulais construir sez Vossa chasa u Vossa abitaziun, duvrais Vus ina permissiun da construcziun. Ulteriuras infurmaziuns en chaussa chattais Vus sin la pagina correspundenta da ch.ch.