Las autoritads svizras online

directamain tar il cuntegn

Far in contract da cumpra per ina proprietad d'abitar

Il contract da cumpra per ina proprietad d'abitar sto vegnir documentà publicamain d'in notar per ch'el saja valaivel. En chantuns, nua ch'i lavuran notars independents, po il cumprader tscherner per regla il notar. Sche chantuns han uschenumnads notars uffizials, As stuais Vus drizzar a l'uffizi cumpetent en chaussa. Quai po esser l'actuar, l'uffizi da concurs u l'uffizi chantunal dal register da commerzi.

Il contract da cumpra sto vegnir suttascrit da tut las partidas participadas – dal cumprader, dal vendider e dal notar. Proprietari daventais Vus però pir cun l'inscripziun en il register funsil. L'annunzia a l'uffizi dal register funsil concernent la midada da maun fa il notar suenter la documentaziun publica dal contract da cumpra.

Infurmaziuns tar puncts impurtants dal contract da cumpra chattais Vus sin la pagina d'internet da hausinfo.ch.

Contactar in notar u chattar in notar uffizial

Puncts impurtants en il contract da cumpra per in bain immobigliar

Custs e taxas

Ils custs e las taxas dal notariat e dal register funsil divergeschan da chantun a chantun. Las taxas dal notar vegnan en la gronda part dals cas divididas tranter il cumprader ed il vendider.

Contract da reservaziun / contract preliminar

Uschenumnads contracts da reservaziun vegnan fatgs savens ozendi. Il vendider s'oblighescha cun in tal contract da reservar in tschert bain immobigliar, il cumprader s'oblighescha d'al cumprar. Quest contract n'è però betg liant, perquai che contracts davart affars cun bains immobigliars ston da princip vegnir documentads dal notar.

Per regla sto vegnir pajà a quint in tschert import il mument ch'il contract vegn suttascrit. Sche la cumpra n'avess la finala betg da reussir, poi esser difficil per il cumprader da survegnir enavos tut il pajament a quint, sche l'import è vegnì transferì al conto dal vendider. Vus pudais dentant pretender dal vendider da metter ils daners sin in conto bloccà e lià a quest intent.