Las autoritads svizras online

directamain tar il cuntegn

Concurs

Sch'ina persuna giuridica vegn stumada e sch'ella na paja betg l'import che vegn pretendì en l'avis da pajament, pon las credituras ed ils crediturs sa drizzar a la dretgira (en il Tessin a la dretgira uffiziala) entaifer 20 dis dapi la communicaziun da l'avis da pajament e laschar declerar la debitura sco insolventa.

L'interpresa sto er annunziar sezza il concurs, sch'ella sto sa resguardar sco insolventa.

Autoritads cumpetentas

Procedura

La dretgira cumpetenta iniziescha la procedura da concurs e cloma las credituras ed ils crediturs da s'annunziar (clom da quints). Sche la debitura na po betg cumprovar ch'ella haja pajà ils debits, declera la dretgira il concurs.

Il register da commerzi vegn infurmà immediatamain davart il concurs. Il concurs vegn publitgà en il fegl uffizial dal chantun respectiv sco er en il Fegl uffizial svizzer da commerzi.

L'uffizi da concurs fa ina glista da las valurs da facultad sequestrablas. Quellas vegnan duvradas. Dal retgav da l'utilisaziun duain las credituras ed ils crediturs vegnir satisfatgs.

Sch'i na dat naginas valurs da facultad utilisablas, terminescha la dretgira la procedura da concurs, nun ch'ina creditura u in creditur pretendia entaifer 10 dis che la procedura vegnia cuntinuada. A las credituras ed als crediturs vegn emess in attest da perdita. Quest document conferma l'import che vegn debità ad els.

Fegl uffizial svizzer da commerzi

Conseguenzas

Per persunas giuridicas vegn terminada l'activitad commerziala e l'interpresa vegn stizzada en il register da commerzi. Las valurs da facultad sequestrablas vegnan duvradas. Dal retgav da l'utilisaziun vegnan las credituras ed ils crediturs satisfatgs uschè bain sco pussaivel.

Concordat

Sche las credituras ed ils crediturs e las debituras ed ils debiturs pon s'accordar cun in contract (import, urari), po il concurs vegnir evità. En quest cas ston las credituras ed ils crediturs e las debituras ed ils debiturs dumandar ina procedura d'accumodament tar la dretgira e preschentar ad ella in sboz dal contract.

Infurmaziuns detagliadas concernent la procedura ed ils agids sin il portal da las interpresas pitschnas e mesaunas (IPM)