Las autoritads svizras online

directamain tar il cuntegn

Concurs privat

Sche Vus avais debits che Vus n'arrivais betg pli da pajar enavos (surdebitaziun), As pudais Vus drizzar a l'uffizi da concurs da Voss lieu da domicil ed annunziar il concurs. Empè d'annunziar il concurs privat, As pudais Vus er laschar cussegliar e sustegnair persunalmain d'ina da las bleras instituziuns.

Il concurs pertutga oravant tut persunas giuridicas ch'èn inscrittas en il register da commerzi. Ma er persunas natiralas pon annunziar in concurs, sch'ellas adempleschan las suandantas premissas.

Premissas

  • La debitura u il debitur è cumprovadamain surdebità.
  •  La debitura u il debitur na po cumprovadamain chattar nagina autra soluziun cun la creditura u cun il creditur.
  • La debitura u il debitur ha a disposiziun 4 000.– francs per pajar ordavant ils custs dal concurs.

Finamira

La finamira dal concurs è quella da registrar tut las credituras e tut ils crediturs sin ina glista ("plan da collocaziun") e d'als pajar enavos sche pussaivel ils debits en la successiun fixada sin il plan. Per quai vegn duvrà il retgav da l'utilisaziun da las valurs da facultad sequestradas.

Consequenzas

Durant il concurs èn bloccads tut ils avis da pajament (inclusiv la sequestraziun) ch'èn drizzads vers la debitura u il debitur. Ultra da quai na pon vegnir emess nagins avis da pajament novs per debits ch'èn vegnids fatgs avant l'introducziun da la procedura da concurs.

Las persunas natiralas pon pratitgar vinavant lur activitad professiunala e disponer libramain dal retgav che resulta suenter la decleraziun dal concurs. La possessura u il possessur d'ina firma singula na po però betg pli duvrar las valurs da facultad da la firma che l'uffizi da concurs ha resguardà sco sequestrablas.

Debits che na vegnan betg pajads giu cumplettamain na vegnan betg extinguids, ma els na ston betg pli vegnir tschainsids.

Attest da perdita

Sche betg tut ils debits n'èn pajads cur che la procedura da concurs vegn terminada e sche la procedura da concurs n'è betg vegnida terminada pervia da mancanza d'activas, emetta l'uffizi da concurs in attest da perdita per mintga debit ch'è restà. Sin quel è notà l'import da la perdita da la creditura u dal creditur e sche la debitura u il debitur ha renconuschì l'import. En quest cas vala l'attest da perdita sco cumprova da renconuschientscha. El permetta a la creditura u al creditur d'introducir ina nova scussiun durant almain 20 onns, sche la situaziun finanziala da la debitura u dal debitur è sa meglierada uschia ch'ella u el po puspè metter d'ina vart daners ("nova facultad").

Glista dals uffizis da scussiun

Dumonda

Dumonda d'in concurs facultativ
Format:
MS Word
Grondezza:
41 kb
Actualisà: