Las autoritads svizras online

directamain tar il cuntegn

Alcohol en il traffic sin via ed durant la navigaziun

Tgi che guida en Svizra in vehichel a motor u ina bartga da sport u da temp liber (sco p.ex. ina bartga da remblar u in pedalo) siond alcoholisà cun ina valur en il sang u en il flad da passa 0,25 mg/l resp. 0,50 promils, sto far quint cun consequenzas giuridicas.

Alcohol en il traffic: davent da 0,25 mg/l resp. 0,5 ‰ u dapli smanatschan sancziuns


Tgi che cuntrafa a la Lescha davart il traffic sin via u davart la navigaziun, sto far quint cun las suandantas proceduras. Da principi èn ellas independentas ina da l'autra:

  • procedura penala (sancziuns: multa, chasti pecuniar, empraschunament)
  • procedura da mesiras administrativas (mesiras: admoniziun, retratga dal permiss da manischar e.u.v.)
    N’astgan ils manischunz da professiun, ils manischunz novs, ils scolars ed ils magisters d’autoscola e lur persunas accumpagnantas betg avair consumà alcohol (≥ o,05 mg/l resp. 0,10 promils).

Chastis e retratga dal permiss da manischar

Tenor la lescha datti trais grads da grevezza sch’insatgi charrescha sut l'influenza d'alcohol:

  • 0,25 fin 0,39 mg/l resp. 0,50 fin 0,79 promils: Tgi che maina in vehichel a motor u ina bartga da sport u da temp liber cun 0,25 fin 0,39 mg/l resp. 0,50 fin 0,79 promils, vegn admonì e survegn ina multa.
  • 0,25 vin 0,39 mg/l resp. 0,50 fin 0,79 promils e supplementarmain cuntravenziun cunter las prescripziuns dal traffic sin via: Tgi che maina in vehichel a motor cun 0,25 vin 0,39 mg/l resp. 0,50 fin 0,79 promils e cuntrafa il medem mument cunter la Lescha davart il traffic sin via u davart la navigaziun, perda il permiss da manischar per almain 1 mais. Supplementarmain vegn pronunzià in chasti pecuniar u in empraschunament fin a 3 onns. L'autezza da la multa / dal chasti pecuniar sa drizza tenor las relaziuns finanzialas da la persuna sentenziada.
  • 0,40 mg/l resp. 0,80 promils: Tgi che maina in vehichel a motor u ina bartga da sport u da temp liber sut l'influenza d'alcohol cun 0,40 mg/l resp. 0,80 promils u dapli, perda il permiss da manischar per almain 3 mais. Supplementarmain vegn pronunzià in chasti pecuniar u in empraschunament fin a 3 onns. L'autezza da la multa / dal chasti pecuniar sa drizza tenor las relaziuns finanzialas da la persuna sentenziada. Ultra da quai vegn la cuntravenziun inscritta en il register penal e figurescha sin l'extract dal register penal per in tschert temp.
  • Cuntravenziuns cun il permiss da manischar sin emprova: Tar l'emprima retratga dal permiss da manischar vegn il temp d'emprova prolungà per 1 onn. Tar ina segunda cuntravenziun vegn annullà il permiss da manischar sin emprova. In nov po vegnir dumandà il pli baud 1 onn pli tard cun in'expertisa psicologica da traffic.

Supplementarmain ston vegnir surpigliads ils custs d'examinaziun e da procedura.