Las autoritads svizras online

directamain tar il cuntegn

Cumprar in'abitaziun secundara u in'abitaziun da vacanzas

Abitaziun secundara

Sco abitaziuns secundaras valan en Svizra abitaziuns che na vegnan duvradas ni da persunas che han lur domicil en la vischnanca correspundenta ni per intents da professiun u da scolaziun. Abitaziuns secundaras vegnan per regla duvradas per far vacanzas e vegnan savens dadas en locaziun a terzas persunas.

Lieu d'abitar secundar

n'abitaziun secundara n'è betg il medem sco in lieu d'abitar secundar. In tal serva per gronda part ad intents da professiun u da scolaziun e na vegn – giuridicamain – betg qualifitgà sco domicil, mabain sco lieu da dimora. Persunas che han in tal lieu d'abitar secundar vegnan savens tituladas sco "dimorantas durant l'emna".

Ordinaziun davart las abitaziuns secundaras

Dapi il 1. da schaner 2013 è en vigur l'uschenumnada Ordinaziun davart las abitaziuns secundaras (perquai che l'iniziativa dal pievel "Per metter ina fin a la construcziun excessiva d'abitaziuns secundaras!" dal protectur da l'ambient Franz Weber è vegnida acceptada en la votaziun dals 11 da mars 2012).

Ella vala per la construcziun d'abitaziuns secundaras novas en vischnancas che han cuntanschì ina quota d'abitaziuns secundaras da dapli che 20 %. Talas vischnancas dastgan permetter la construcziun d'abitaziuns secundaras mo pli sut tschertas cundiziuns.

Ulteriuras infurmaziuns en connex cun la limitaziun d'abitaziuns secundaras incl. las vischnancas pertutgadas chattais Vus sin la pagina d'internet da l'Uffizi federal da svilup dal territori.

Imposiziun da taglia sin abitaziuns secundaras

Abitaziuns secundaras vegnan tractadas fiscalmain en moda sumeglianta sco immobiglias d'abitar che vegnan duvradas permanentamain. Ulteriuras infurmaziuns chattais Vus sin la pagina d'internet da hausinfo.ch.

Acquist d'abitaziuns da vacanzas/d'abitaziuns secundaras tras persunas da l'exteriur

Persunas estras che vulan cumprar in'abitaziun da vacanzas u in'abitaziun secundara dovran ina permissiun. Ulteriuras infurmaziuns en chaussa chattais Vus sin la pagina correspundenta da ch.ch