Partidas da locaziun: I sto vegnir fixà tgi ch'è il locatur e tgi ch'è il locatari. Mo tgi che suttascriva il contract sco locatari, daventa locatari cun tut ils dretgs e cun tut las obligaziuns.

Object da locaziun: I sto vegnir fixà tge ch'il locatur surlascha al locatari per tge utilisaziun. I stuessan er vegnir inditgadas localitads sco: surchombras, tschaler, lavandaria e.u.v.

Durada da la locaziun: Contracts da locaziun pon vegnir fatgs per in temp limità u per in temp illimità. La gronda part dals contracts vegn fatga per in temp illimità. En quest cas pon tuttas duas partidas inoltrar la disditga, sch'ellas observan tschertas reglas e tscherts termins.

Tschains da locaziun e custs accessorics: Fixads vegnan per regla il tschains da locaziun mensil e la cumposiziun da quel (tschains da locaziun net plus custs accessorics). Sch'i na vegnan inditgads nagins custs accessorics, vegni supponì ch'els sajan inclus en il tschains da locaziun.

Deposit dal tschains da locaziun: In deposit dal tschains da locaziun (er numnà cauziun) sto vegnir pajà mo, sche quai è fixà explicitamain en il contract da locaziun. El vegn pajà sin in conto da cauziun dal tschains da locaziun e serva al locatur sco segirezza. I sto vegnir fixà l'import (tar locals d'abitar maximalmain trais tschains da locaziun mensils) che sto vegnir deponì dal locatari sco cauziun.

Cun il consentiment dal locatur dastgan abitaziuns vegnir dadas en sutlocaziun.