directamain tar il cuntegn

Tgi gudogna, sche dus u dapli candidats han survegnì tuttina bleras vuschs?

Quest cas è rar, dentant betg nunpussaivel. Sche dus candidats da la medema glista survegnan tuttina bleras vuschs e sche questa glista ha mo il dretg d'in sez en il parlament, prevesa la lescha ch'i vegnia tratg la sort.

Il cas

23'979: Uschè bleras vuschs ha survegnì Monica Duca Widmer, candidata tessinaisa da la Partida cristiandemocratica (PCD) per il Cussegl naziunal, a chaschun da las elecziuns 2011. 23'979 vuschs ha survegnì l'onn 2011 er Marco Romano, medemamain candidat tessinais da la PCD per i Cussegl naziunal. Tgi ha survegnì il mandat? Co è vegnida sclerida la dumonda? Suenter ina decisiun automatica tras la sort, ch'è vegnida prendida dal computer la saira da la dumbraziun dals cedels electorals (questa decisiun è vegnida abolida pli tard dal Tribunal federal; cf. las duas sentenzias qua sutvart), è la sort vegnida tratga a maun ils 25 da november per decider tgi ch'è elegì. Gudagnà ha Marco Romano.

Tge di la lescha?

La Lescha federala davart ils dretgs politics e duas sentenzias dal Tribunal federal prescrivan che unicamain la sort decida, tgi ch'è elegì sche pliras candidatas u plirs candidats han tuttina bleras vuschs. La sort sto vegnir ordinada da la regenza chantunala; ella sto vegnir tratga a maun, en il rom d'ina sesida publica e tras in commember preschent da questa regenza. Tut las partidas pertutgadas – en spezial las candidatas ed ils candidats sco er las partidas ch'èn pertutgadas da la decisiun – han il dretg dad esser preschentas a la decisiun tras la sort.

Trair la sort sin via electronica n'è betg admess, perquai che questa metoda na garantescha – tenor il Tribunal federal – betg effectivamain ad omadus candidats la medema probabilitad da vegnir elegids; quai vul dir in tractament egual da tuttas duas partidas na fiss betg garantì.

Las basas legalas

Art. 20 da la Lescha federala davart ils dretgs politics
Art. 43 da la Lescha federala davart ils dretgs politics

Las decisiuns dal Tribunal federal

2012: DTF 138 II 5 (mo en talian)
2012: DTF 138 II 13

La decisiun tras la sort en l'istorgia

Er sch'ina paritad da las vuschs tranter dus candidats per il Cussegl naziunal è pussaivla, resta ella in fenomen fitg rar. Il cas dal Tessin è unic fin oz. A la Chanzlia federala è dentant enconuschent in auter cas d'ina decisiun tras la sort. Giuridicamain era quel dentant vegnì motivà en autra moda e maniera che tar las elecziuns 2011. Il cas datescha da l'onn 1939, cur che la sort ha stuì vegnir tratga tranter ils dus candidats dal chantun Basilea-Champagna Hugo Gschwind (Partida catolic-conservativa) e Walter Hilfiker (Partida socialdemocratica). La veglia Constituziun preveseva numnadamain anc che mo in commember da la regenza chantunala possia vegnir elegì en il Cussegl naziunal. Per il protocol saja anc agiuntà ch'il candidat conservativ ha la finala survegnì il mandat.